Japonııa Reseıge taǵy da sanktsııa saldy

MÁSKEÝ. TASS- QazAqparat – Japonııada 26 qyrkúıekte el úkimetiniń Reseı Federatsııasyna hımııalyq qarý óndirýge qatysty taýarlardy jetkizýge tyıym salýdy belgileý týraly sheshimine baılanysty salynǵan sanktsııalar juma kúni kúshine endi, dep habarlaıdy QazAqparat TASS aqparat agenttigine silteme jasap.

Sanktsııaǵa kirgen taýarlar tizimine hlor, metanol, atseton, etılen jáne natrıı gıpohlorıtin qosa alǵanda, hımııalyq zattardyń 73 túri engizilgen.

Sonymen qatar tsentrıfýgalar, jylý almastyrǵyshtar jáne kondensatorlar sııaqty hımııalyq jabdyqtyń 16 túrin eksporttaýǵa tyıym salyndy.

Japon bıligi buǵan deıin Ýkraınadaǵy jaǵdaıǵa baılanysty Reseı Federatsııasyna qatysty shekteý sharalarynyń birneshe keshenin bekitken bolatyn. «Otkrytıe» banki, Novıkombank, Sovkombank, VTB, «Rossııa» banki, Promsvıazbank, VEB. RF, Sberbank jáne Alfa-banktiń, sondaı-aq Reseıdegi 40-qa jýyq uıymdar men kompanııalardyń aktıvterin buǵattady.

Eksportqa tyıym salynǵan taýarlar men tehnologııalar tizbesi 400-den astam ataýdy qamtyp otyr. Sonyń ishinde jartylaı ótkizgishter, teńiz jáne avıatsııa qaýipsizdigine arnalǵan jabdyqtar, telekommýnıkatsııa quraldary, baılanys quraldary, áskerı maqsattaǵy buıymdar, sonyń ishinde qarý-jaraq, baǵdarlamalyq qamtamasyz etý, munaı óńdeý jabdyqtary, júk kólikteri, júkti ózi túsiretin kólikter, býldozerler, ónerkásipte qoldanylatyn temir jol lokomotıvteri, stanoktar jáne basqa elektr jabdyqtary bar. Reseıge sándi taýarlar, sonyń ishinde quny 6 mln ıennen (shamamen 49 myń dollar) asatyn kólikterdi jetkizýge tyıym salyndy, sondaı-aq Reseıden altyn ákelýge tyıym salyndy.

Foto: tass.ru