Japonııa premer-mınıstri táýligine úsh saǵat qana uıyqtaıdy
ASTANA. KAZINFORM — Japonııanyń premer-mınıstri Sanae Takaıtı qyzmetine kiriskeli beri táýligine nebári úsh saǵatqa deıin ǵana uıyqtaıtynyn aıtty. Bul málimdeme qoǵamda qyzý pikirtalas týdyrdy, dep habarlaıdy Kyodo.
Biri úkimet basshysynyń eńbekqorlyǵyna tánti bolsa, endi biri sozylmaly uıqysyzdyqtyń el taǵdyryna qatysty mańyzdy sheshimderdiń sapasyna kesiri tııýi múmkin ekenin aıtty.
X áleýmettik jelisinde jarııalaǵan jazbasynda Sanae Takaıtı ótken jyldyń qazan aıynan beri tolyqqandy demalýǵa múmkindik bolmaı júrgenin aıtty. Onyń sózinshe, túngi ýaqyttyń basym bóligi memlekettik qujattardy qaraýǵa jáne úı sharýalaryna arnalady.
Premer-mınıstr ulttyq merekege tuspa-tus kelgen uzaq demalys kúnderi jınalyp qalǵan myńdaǵan elektrondy hatty qarap shyqqan. Sonymen qatar osy aralyqta alǵash ret bes saǵat uıyqtaýǵa múmkindik týǵanyn aıtty.
Bul málimdeme saıasatkerler men áleýmettik jeli qoldanýshylary arasynda qyzý talqylandy.
Oppozıtsııalyq Demokratııalyq halyq partııasynyń jetekshisi ıÝıtıro Tamakı Takaıtıdiń eńbekqorlyǵyn joǵary baǵalady. Degenmen onyń aıtýynsha, premer-mınıstr mindetterdiń bir bóligin ózge qyzmetkerlerge júktep, tek úkimet basshysy atqara alatyn strategııalyq máselelerge basymdyq berýi kerek. Sondaı-aq ol tolyqqandy demalys tıimdi memlekettik basqarýdyń ajyramas bóligi ekenin atap ótti.
Ortalyq reformatorlar partııasynyń depýtaty Torý Kýnısıge de alańdaýshylyq bildirdi. Onyń pikirinshe, sozylmaly uıqysyzdyq salmaqty sheshim qabyldaý qabiletin álsiretip, daǵdarys jaǵdaıynda eldi basqarý tıimdiligine kesirin tıgizýi múmkin.
Bul Sanae Takaıtıdiń jumysqa qatysty málimdemesi alǵash ret qoǵam nazaryn aýdaryp otyrǵan joq. Ol buǵan deıin bıleýshi Lıberaldyq-demokratııalyq partııanyń tóraıymy bolyp saılanǵannan keıin «jumys isteımin, taǵy da jumys isteımin jáne jumys isteı beremin» dep málimdegen edi. Sol kezde de bul sózder Japonııada jumys pen jeke ómir arasyndaǵy tepe-teńdikti saqtaý saıasatyna qaıshy kelip, shamadan tys eńbek etýdi dáripteı me degen qyzý pikirtalas týǵyzǵan edi.
Áleýmettik jelilerde de pikirler ekige jaryldy. Birqatar qoldanýshy premer-mınıstrdiń jankeshti eńbegin qoldasa, endi biri bul jazba jurttyń janashyrlyǵyn oıatýǵa baǵyttalǵan áreket dep baǵalady. Olar úkimet basshysy óz mindetterin tıimdirek bólip, shekten tys jumysbastylyǵyn kórsetýdiń ornyna basqarý júıesin ońtaılandyrýy qajet ekenin aıtty.
Keıbir pikir bildirýshiler bul jazbanyń jarııalanýyn Imperatorlyq úı týraly zańǵa engizilgen ózgeristerden keıin mınıstrler kabınetiniń reıtıngi tómendeýimen baılanystyrdy.
Alaıda Mınıstrler kabıneti bas hatshysy Mınorý Kıhara mundaı joramaldardy joqqa shyǵardy. Onyń aıtýynsha, premer-mınıstrdiń sózi jumys pen jeke ómir arasyndaǵy tepe-teńdik qaǵıdatynan bas tartýdy bildirmeıdi.
Al bıleýshi partııanyń saıası bóliminiń jetekshisi Takaıýkı Kobaıası Sanae Takaıtıdiń eńbekke degen joǵary jaýapkershiligin atap ótip, sonymen qatar oǵan tolyqqandy demalysqa da ýaqyt bólýdiń mańyzyn eske saldy.
Eske salaıyq, buǵan deıin Japonııa ımperatorlyq áýlet týraly zańǵa ózgeris engizetinin jazǵanbyz.
