Japonııa premer-mınıstri sheteldikterge arnalǵan jańa kvota týraly málimdeme jasady

ASTANA. KAZINFORM – Japonııa premer-mınıstri Sanae Takaıtı óz úkimeti sheteldik jumysshylardy tartý baǵdarlamalaryn, sonyń ishinde kvota shegin belgileýdi «tıisti túrde basqarýdy» kózdep otyrǵanyn málimdedi, dep habarlaıdy Kyodo.

Bul málimdeme mıgranttar aǵynyna qatysty qoǵamnyń alańdaýshylyǵynyń artýy jáne Parlamenttegi popýlıstik partııanyń suraqtary aıasynda jasaldy.

Ótken aıda Japonııanyń alǵashqy áıel premer-mınıstri bolǵan jáne konservatıvti kózqarasymen tanymal premer-mınıstr úkimet vıza merziminen asyp ketkenderge qarsy qatań sharalar qabyldaıtynyn jáne jyljymaıtyn múlikke spekýlıatıvti sheteldik ınvestıtsııalardy shekteıtinin atap ótti. Osy máselelerdi sheshý úshin ol jańa mınıstrlik laýazym qurdy.

Parlament otyrysynda sóılegen sózinde Takaıtı bilikti jumysshylarǵa arnalǵan vıza baǵdarlamasy jáne 2027 jyly jumys isteı bastaıtyn jańa kásiptik oqytý júıesi sheteldikterge «jumys kúshi jetispeıtin sektorlarda óz qabiletin durys júzege asyrýǵa» múmkindik berýge baǵyttalǵanyn atap ótti.

Onyń aıtýynsha, úkimet sheteldik jumysshylardy qabyldaýdyń bolashaq tásilderin anyqtaý úshin «irgeli zertteýler» júrgizedi. Bul eldegi halyqtyń azaıýy men týý deńgeıiniń tómendigine baılanysty.

Sońǵy jyldary Japonııadaǵy sheteldik jumysshylardyń sany artyp keledi, biraq vıza merziminiń ótýinen bastap memlekettik qyzmetterdi teris paıdalanýǵa deıingi buzýshylyqtarǵa qatysty shaǵymdar da artty.

Specified Skilled Worker júıesi boıynsha 1-tıpti vıza ıelerine Japonııada bes jylǵa deıin turýǵa múmkindik beredi, al 2-tıpti vıza – joǵary bilikti mamandar úshin – otbasy múshelerimen birge turaqty turýǵa múmkindik beredi. Japonııa 2024 jyldyń sáýirinen bastap bes jyl ishinde 820 000-ǵa deıin 1-tıpti vıza ıelerin qabyldaýdy josparlap otyr, bul burynǵy shekten eki ese kóp.

Jańa oqytý jáne jumyspen qamtý júıesi sheteldikterdi arzan jumys kúshi retinde paıdalaný jáne adam quqyqtaryn buzý úshin synǵa ushyraǵan tehnıkalyq taǵylymdama baǵdarlamasyn almastyrady.

Aıta keteıik, Sanae Takaıtı Japonııanyń basqarýshy partııasynyń tóraıymy bolyp saılandy.

Memleket basshysy Japonııa Premer-mınıstrine quttyqtaý jedelhatyn joldady.