Japonııa premer-mınıstri saılaýdaǵy jeńilisten keıin de qyzmetinde qalatynyn málimdedi

ASTANA. KAZINFORM – Japonııanyń premer-mınıstri Sıgerý Isıba Parlamenttiń joǵarǵy palatasyna ótken saılaýda bılik koalıtsııasynyń jeńilis tabýyna qaramastan, qyzmetinde qalatynyn málimdedi. Bul týraly Sınhýa agenttigi habarlady.

Press-konferentsııa barysynda ol saılaý nátıjeleriniń kóńil kónshitpeıtinin moıyndap, bul úshin úlken jaýapkershilik sezinetinin aıtty. 

– Qazirgi eń mańyzdy másele – eldegi saıası turalap qalýdy boldyrmaý, – dedi Isıba.

Premerdiń bul málimdemesi Japonııada ómir súrý qunynyń ósýi men saıası qatelikterge qatysty halyq narazylyǵy kúsheıip turǵan shaqta aıtyldy. Sarapshylardyń pikirinshe, bul faktorlar bılik koalıtsııasynyń jeńilýine sebep bolǵan.

Bul joly japondyqtar Joǵarǵy palatadaǵy 248 orynnyń 125-ine depýtattar saılady. Daýys berý nátıjesi boıynsha Lıberal-demokratııalyq partııa (LDP) nebári 39 mandat ıelense, onyń seriktesi – «Komeıto» partııasy 8 oryn aldy. Koalıtsııa 50 mandatqa qol jetkizýdi kózdegen edi, biraq bul mejege jete almady.

Qazirgi tańda koalıtsııa Joǵarǵy palatada 122 mandatqa ıe, al kópshilik bolý úshin 125 oryn qajet.

Saılaýdaǵy sátsizdikke qaramastan, Sıgerý Isıba úkimettegi turaqtylyq pen sabaqtastyqty qamtamasyz etý qajettigin atap ótip, premer-mınıstr qyzmetin jalǵastyra beretinin resmı túrde málimdedi.

Buǵan deıin Japonııada parlamenttiń joǵarǵy palatasynyń saılaýy ótkenin jazdyq.