Japonııa premer-mınıstri jol apatyna ushyrady
ASTANA. 28 sáýir. QazAqparat - Japonııanyń premer-mınıstri Sındzo Abeniń avtokóligi Tokıo ortalyǵynda jol-kólik oqıǵasyna ushyrady. Premerdiń ózi zardap shekken joq, dep habarlaıdy Ýtro.rý.
Oqıǵa senbi kúni aqyly joldardyń birinde tólem júrgizý pýnktiniń janynda oryn aldy. Japon avtokólikterinde jolda júrý aqysyn avtomatty túrde tóleýge arnalǵan elektrondyq kartochkalar ornatylǵan. Olar osy pýnkttiń janynan ótkende aqsha kartochkadan alynyp, shlagbaým avtomatty túrde kóteriledi. Júrgizýshige tek jyldamdyqty azaıtsa ǵana bolǵany.
Alaıda osy kúni tehnıkalyq aqaý saldarynan shlagbaým avtomatty túrde kóterilmeı qalǵan. Sol sebepti premer kortejiniń alǵashqy kóligi shuǵyl tejegishti basady, onyń artyna ekinshi avtomobıl, oǵan sáıkesinshe úshinshisi kelip soǵylady. Osylaısha, premer kortejiniń bes kóligi apatqa ushyraǵan, sonyń ishinde Abe otyrǵan lımýzın de bar.
Úkimet basshysy zardap shekpegen, jol-kólik oqıǵasynyń saldary joıylǵan soń ol saparyn jalǵastyrdy. Abe Soltústik Koreıaǵa qarsy mıtıngke bara jatqan bolatyn.
