Japonııa premer-mınıstri: Tokıodaǵy Olımpıada oıyndary kórermendersiz ótýi múmkin

TOKIO. Kyodo-QazAqparat – Japonııa premer-mınıstr Esıhıde Sýga Tokıodaǵy Olımpıada oıyndary eldegi COVID-19 jaǵdaıyna baılanysty kórermendersiz ótýi múmkin ekendigin málimdedi, dep habarlaıdy QazAqparat Kyodo-ǵa silteme jasap.

«Men buǵan deıin de kórermenderdiń bolmaýy múmkin ekenin aıtqanmyn», – dedi premer-mınıstr jýrnalısterge. – Qalaı bolǵanda da, biz japon halqynyń qaýipsizdigin basty mindetimiz dep sanaımyz».

Ótken aıda olımpıadany uıymdastyrýshylar 23 shildede bastalatyn oıyndardyń qaýipsizdigin qamtamasyz etý maqsatynda syıymdylyǵy 10 000 adamǵa deıin bolatyn nysandardy 50 paıyzǵa deıin toltyrýdy uıǵarǵan edi.

Alaıda Tokıoda ótken aıda koronavırýsqa baılanysty tótenshe jaǵdaı alynyp tastalǵan soń ınfektsııa kúrt artty. Bul kóp jankúıer jınalatyn oıyndardy ótkizýge bola ma, joq pa degen kúdikti qoıýlatty.

Beısenbide Tokıo úkimeti koronavırýstyń 673 jańa jaǵdaıy týraly habarlady, onyń kúndelikti sany 26 mamyrdan bastap alǵash ret 700-den asty.

Juqpaly aýrýlar jónindegi sarapshylar, onyń ishinde premer-mınıstrdiń bas keńesshisi COVID-19 mınıstri Sıgerý Omı de oıyndardy kórermendersiz ótkizý «eń qaýipsizi» dep málimdedi.

Mınıstrler kabıneti hatshylyǵynyń málimetinshe, beısenbide Germanııa boks jáne qaıyq jarysy komandalary, Irlandııa boks quramasy jáne Avstralııa fýtbol komandasy bar, barlyǵy 100-den astam adam kelgen. Al jeksenbige deıin olardyń qatary taǵy 400-ge jýyq adamǵa tolyǵady dep josparlanýda.