Japonııa premer-mınıstri delfınder aýlaýdy ulttyq mádenı dástúrge jatqyzady
ASTANA. 26 qańtar. QazAqparat - Japonııa premer-mınıstri Sındzo Abe delfınderdi aýlaý isin ulttyq mádenıet túrine jatqyzyp, halyqaralyq qaýymdastyq bul máselege túsinistikpen qaraıdy degen úmitin bildirdi. Bul týraly japon úkimetiniń basshysy amerıkandyq CNN telearnasyna bergen suhbatynda málimdedi, dep jazady ITAR-TASS.
«Taıdzı qalasyndaǵy delfınderdi aýlaý - ulttyq mádenıetimizde ózindik orny bar balyq aýlaýdyń ejelgi dástúri, - deıdi Abe. - Jurtshylyq bizge túsinistikpen qaraıdy degen úmittemiz». Japon úkimetiniń basshysy «ár eldiń ár aımaǵynyń urpaqtan-urpaqqa jalǵasyp kele jatqan, ustanatyn ózindik salt-joralǵylary bar. Olardy qurmetteý kerek dep sanaımyn», - deıdi. Sındzo Abe sondaı-aq álemdik qaýymdastyqtyń delfınderdi aýlaý isin qatań synǵa alatynyn biletindigin atap ótti. «Bul isti biz qatań rettep otyrmyz», - dedi ol. Delfınderdi aýlaýǵa qarsylyq bildirý sıpatyndaǵy pikirlerdiń týyndaýyna AQSh-tyń Japonııadaǵy jańa elshisi Kerolaın Kennedıdiń «Tvıtter» áleýmettik jelisindegi óziniń mıkroblogyna ótken aptada «Balyq aýlaý kásibindegi delfınderdiń aıaýsyz qyryp-joıylýyn men quptamaımyn. AQSh úkimeti delfınderdiń bulaısha óltirilýine qarsylyq bildiredi», - dep jazýy sebep bolǵan.
