Japonııa parlamenti ekinshi astana qurý týraly zańdy maquldady
ASTANA. KAZINFORM – Japonııa parlamenti eldiń rezervtik astanasyn qurýdy kózdeıtin zańdy qabyldady, dep habarlaıdy Kyodo agenttigi.
Jańa tetik Tokıoda iri jer silkinisi, tabıǵı apat nemese ózge de tótenshe jaǵdaı bolǵan jaǵdaıda ortalyq memlekettik organdardyń jumysyn basqa qalaǵa kóshirýge múmkindik beredi.
Zań jobasyn Lıberaldyq-demokratııalyq partııa jetekshilik etetin bıleýshi koalıtsııa usyndy.
Jańa normalarǵa sáıkes, premer-mınıstr halyq sany men ekonomıkalyq damý deńgeıine qoıylatyn talaptarǵa saı keletin prefektýralardyń ishinen rezervtik astanany tańdaýǵa quqyly bolady. Sheshim óńirlerdiń ótinimderi negizinde qabyldanady.
Bul bastama byltyr qazanda Lıberaldyq-demokratııalyq partııa men Japonııanyń ınnovatsııalyq partııasy (JIP) arasynda jasalǵan koalıtsııalyq kelisimniń bir bóligi boldy. Zańdy qoldaýshylardyń pikirinshe, rezervtik astana aýqymdy tótenshe jaǵdaı kezinde memlekettik ınstıtýttardyń úzdiksiz jumysyn qamtamasyz etedi.
Oppozıtsııalyq partııalar bul qujatqa qarsy shyqty. Olardyń pikirinshe, zań kóbine dástúrli túrde Osakada qoldaýǵa ıe Japonııanyń ınnovatsııalyq partııasynyń múddesine saı keledi. Synshylar bul zań Osakany eldiń iri ákimshilik ortalyǵyna aınaldyrý jobasyn júzege asyrýǵa yqpal etýi múmkin dep esepteıdi.
Bıleýshi koalıtsııa men oppozıtsııa arasyndaǵy kelispeýshilikter bastamany talqylaýdy eki aptaǵa jýyq ýaqytqa sozdy. Daýly máselelerdiń biri jergilikti saılaý men referendýmdardy bir kúnde ótkizýge tyıym salý týraly usynys boldy. Qujatqa ózgerister engizilgennen keıin oppozıtsııa ony túpkilikti daýysqa salýǵa kelisti.
Sol kúni parlamenttiń joǵarǵy palatasy Konstıtýtsııaǵa ózgerister engizý jónindegi referendýmdardy ótkizý tártibin jetildirýge qatysty zań jobasyn da qoldady. Sonymen qatar Keńesshiler palatasy óziniń resmı ataýyn Senat dep ózgertý týraly sheshim qabyldady.
Buǵan deıin Japonııa saılaý kezinde áleýmettik jelilerdi paıdalaný erejelerin qatańdatqanyn habarlandy.
