Japonııa óziniń otandyq JI salasyn damytýǵa 6,34 mlrd dollar bóledi
ASTANA. KAZINFORM — Japonııa úkimeti otandyq jasandy ıntellektini damytý maqsatynda aldaǵy bes jylda shamamen 1 trıllıon ıen (6,34 mlrd dollar) bólýdi josparlap otyr. Qarajat SoftBank Group bastaǵan onǵa jýyq kompanııa qatysatyn jańa JI kompanııasyn qoldaýǵa baǵyttalmaq. Bul týraly Kyodo jazdy.
Joba 2026 qarjy jylynan bastalyp, eldegi eń iri bazalyq jasandy ıntellekt modelin memleket pen jekemenshik áriptestik aıasynda ázirleýdi kózdeıdi. Bul sheshim Qytaı men AQSh-pen tehnologııalyq básekege tótep berý jáne ulttyq qaýipsizdikti nyǵaıtý maqsatynda qabyldanǵan.
Jańa kompanııaǵa SoftBank pen Preferred Networks-tiń shamamen 100 ınjeneri tartylady. Úkimet sondaı-aq jartylaı ótkizgishtermen qamtamasyz etýge jáne derekter ortalyqtaryn damytýǵa qoldaý kórsetpek.
«Japonııa jasandy ıntellektini qoldaný jaǵynan artta qalyp otyrǵandyqtan, úkimet negizgi bazalyq jospar ázirleýdi kózdep otyr. Atalǵan jospardy jaqyn arada Mınıstrler kabıneti bekitýi tıis. Qujatta úkimet ulttyq qýatty nyǵaıtý jáne tsıfrlyq alshaqtyqty qysqartý úshin otandyq jasandy ıntellektini damytý men derekterdi óńdeý ortalyqtaryn qoldaýdyń mańyzdylyǵyn erekshe atap ótpek», dep jazdy Kyodo.
Sonymen qatar Japonııa robototehnıkamen ushtasqan «fızıkalyq JI»-di damytýǵa basymdyq berýdi josparlap otyr.
Aıta ketsek, Qasym-Jomart Toqaev jasandy ıntellekt tehnologııasyn EAEO qyzmetine engizýdi usyndy.
Al otandyq maman Qazaqstan jasandy ıntellektini jedel engizbese, básekeden qalyp qoıýy múmkin ekenin aıtty.
