Japonııa Osakada EKSPO-2025 Búkilálemdik kórmesin ótkizýdi kózdep otyr
Basqarma tóraǵasy mártebeli meımanǵa kórme aıaqtalǵan soń, Ulttyq kompanııaǵa mindettelgen birqatar jumystar jóninde aıtyp berdi. Sondaı-aq, E.Shormanov 2017 jylǵy qarashanyń 10-nan bastap «Nur Álem» Ulttyq pavılony, Úzdik tájirbıeler aımaǵy, Energııa holy jáne Kongress ortalyǵynyń kelýshiler úshin qaıta iske qosylǵanyna da toqtaldy.
Kezdesý barysynda «Astana» Halyqaralyq qarjy ortalyǵy, «Astana Hub» ІT-startaptarynyń halyqaralyq tehnoparki, Jasyl tehnologııalar ortalyǵy jáne ózge de uıymdar jaıǵasatyn nysandarda qaıta jóndeý jumystary júrgizilip jatqany baıandaldy.
Erbol Shormanov Japonıanyń «Astana EKSPO-2017» kórmesine qatysqany úshin Itıro Kavabataǵa alǵysyn bildirdi.
«Japonııa kórmege qatysatynyn alǵashqy bolyp rastaǵan memleketterdiń qatarynda. Kórme kezinde Kúnshyǵys eliniń pavılony eń kóp tamashalanǵan «Úzdik 10» pavılon (700 myń adam tamashalaǵan) qatarynan oryn aldy. EKSPO-2017 barysynda, kórmege kelýshiler japon halqynyń mádenıetimen jáne dástúrimen etene tanysyp, jaryqdıody, baldyr bıomassasy jáne sýtekti energetıka salasyndaǵy sońǵy tehnologııalaryn tamashalady. Eń bastysy, eki eldiń bıznes ókilderi ózara baılanys ornatty», - dedi E.Shormanov.
Óz kezeginde Japonııa elshisi EKSPO-2017 kórmesiniń uıymdastyrylý deńgeıine joǵary baǵa berdi.
«EKSPO-2017 Halyqaralyq mamandandyrylǵan kórmesiniń ótkizilýi eki el arasyndaǵy dostyq qarym-qatynastyń nyǵaıýyna sep bolǵanyn úlken senimmen aıta alamyn», - dedi I.Kavabata.
Sondaı-aq, I.Kavabata myrza Japonııanyń Osaka qalasynda EKSPO-2025 Búkilálemdik kórmesin ótkizý quqyǵyna ıe bolýy baǵytyndaǵy jumystardy ilgeriletýde ekenin tilge tıek etti.
Kezdesý sońynda Erbol Shormanov Itıro Kavabata myrzaǵa bólgen ýaqyty úshin alǵys aıtyp, Japonııa tarapynyń joǵary tehnologııalar men jasyl energetıka salasynda aldaǵy ýaqytta da birlesip jumys atqaratynyna senim bildirdi.
