Japonııa Ortalyq Azııaǵa ekonomıkalyq kómek paketin jarııalaıdy

TOKIO. KAZINFORM – Japonııa premer-mınıstri Fýmıo Kıshıda tamyz aıynda Qazaqstanda Ortalyq Azııanyń bes eliniń basshylarymen kezdesý ótkizip, aımaqqa ekonomıkalyq kómek kórsetý paketin jarııalaıdy. Bul týraly Japonııa úkimetiniń ókilderine silteme jasap, The Japan Times habarlady.

– Kıshıdanyń 9-12 tamyz aralyǵynda Ózbekstan, Qazaqstan jáne Mońǵolııaǵa sapary josparlanǵan. Ekonomıkalyq paket saýda jolyn qurýǵa, dekarbonızatsııaǵa jáne adamdar arasyndaǵy almasýdy ilgeriletýge baǵyttalǵan. Bul Qazaqstandaǵy altyjaqty sammıtten keıin jarııalanatyn birlesken málimdemeniń bir bóligi bolady dep kútilýde, – delingen habarlamada.

Kómek josparyna sáıkes, Japonııa Ortalyq Azııa men Eýropany Reseısiz baılanystyratyn Kaspıı teńizi arqyly saýda jolyn qurýǵa kómektesedi. Sondyqtan Japonııa turaqty eksporttyq baǵyt aımaqqa ekonomıkalyq táýelsizdik beredi dep úmittenedi.

– Dekarbonızatsııa salasynda japondyq kompanııalardyń tehnologııalary men nesıeleri tabıǵı gazdy óńdeýge kómektesý sııaqty sharalarǵa jumsalady dep kútilýde. Japonııa óńirden bilikti jumysshylardy qabyldaýdy josparlap otyr, – delingen habarlamada.

Tokıonyń Qytaı jáne Reseı sııaqty qýatty eldermen tyǵyz baılanysy bar aımaqqa turaqty ekonomıkalyq damýǵa kómektesýdi maqsat etkeni atap ótildi.

– Ortalyq Azııa Shyǵys Azııa men Eýropa arasyndaǵy negizgi geosaıası aımaq jáne gaz sııaqty tabıǵı resýrstarǵa baı. Qytaı sońǵy jyldary ondaǵy ekonomıkalyq yqpalyn keńeıtýde, AQSh pen Eýroodaq ta baılanystardy nyǵaıtýǵa umtylýda, – dep jazdy The Japan Times.

Buǵan deıin Japonııa premer-mınıstri Fýmıo Kıshıda Qazaqstanǵa keletinin habarlaǵan edik.