Japonııa Ormýz buǵazyna qatysty jaǵdaıǵa baılanysty munaı qoryn paıdalanbaq
ASTANA. KAZINFORM — Japonııa úkimeti 1 mamyrdan bastap strategııalyq munaı qorynan 20 kúndik tutynýǵa teń kólemdi naryqqa shyǵarýdy josparlap otyr. Bul sheshim Ormýz buǵazy tóńiregindegi belgisizdikke baılanysty qabyldandy, dep jazdy Anadoly agenttigi.
Japonııanyń Ekonomıka, saýda jáne ónerkásip mınıstrligi málimetinshe, naryqqa shamamen 5,8 mln kılolıtr munaı (quny 3,4 mlrd dollar) jetkiziledi.
Bul qadam AQSh pen Iran arasynda ýaqytsha bitim jasalǵanyna qaramastan, Ormýz buǵazynyń tolyq ashylýyna qatysty belgisizdik saqtalyp otyrǵandyqtan qolǵa alynyp otyr.
Buǵan deıin, naýryz aıynda Japonııa Taıaý Shyǵystaǵy shıelenis aıasynda 50 kúndik munaı qoryn paıdalanǵan bolatyn.
Ormýz buǵazy – álemdik energetıka úshin asa mańyzdy teńiz joly. Aqpan aıynyń sońynda AQSh pen Izraıldiń birlesken soqqylarynan keıin bastalǵan qaqtyǵys aıasynda Iran buǵazdy jaýyp, munaı baǵasy soǵysqa deıingi deńgeımen salystyrǵanda shamamen 65%-ǵa ósti.
Keıin 8 sáýirde AQSh pen Iran arasynda atysty toqtatý týraly kelisim jasalǵanymen, Donald Tramp 13 sáýirde Iranǵa qarsy teńiz blokadasyn engizý týraly sheshim qabyldady. Bul aıasynda Ormýz buǵazy arqyly ótetin ırandyq kemelerge qarsy sharalar kúsheıtildi.
17 sáýirde Iran buǵazdy kommertsııalyq keme qatynasy úshin ashýǵa daıyn ekenin málimdedi, alaıda AQSh-tyń blokadany jalǵastyrýy týraly málimdemesinen keıin Tegeran qaıtadan shekteýler engizdi.
Osy kezeńde AQSh Oman teńizi men Úndi muhıtynda ırandyq keıbir kommertsııalyq kemelerdi ustap, shabýyl jasaǵan. Buǵan jaýap retinde Iran Ormýz buǵazy mańynda birqatar kemelerdiń qozǵalysyna aralasyp, keıbirin, sonyń ishinde Izraılmen baılanysty kemelerdi, qolǵa túsirdi.
Buǵan deıin Ormýz buǵazy arqyly álemdik munaı saýdasynyń shamamen 20%-y ótetinin jazdyq.
