Japonııa Olımpıadanyń sheteldik kórermenderin eki aptalyq karantınnen bosatpaq

TOKIO. KYODO NEWS - QazAqparat – Japonııa úkimeti 2021 jylǵy Tokıo Olımpıadasyna keletin sheteldikterdi eki aptalyq karantınnen ótý qajettiliginen bosatý týraly máseleni qarastyrýda, dep habarlaıdy QazAqparat KYODO NEWS agenttigine silteme jasap.

Sondaı-aq Japonııa bıligi Olımpıadanyń sheteldik kórermenderiniń elge kirýine mindetti sharttar jasaýdy josparlap otyr. Onyń negizinde shetel azamattary elge kelmes buryn jasalǵan koronavırýs testileýiniń teris nátıjesi týraly birneshe anyqtamanyń bolýy shart. Kelgennen keıin sheteldik azamattar jergilikti bıliktiń baqylaýynda bolady.

Eske sala keteıik, Tokıo Olımpıadasy 2020 jyldyń 24 shildesi men 9 tamyzy aralyǵynda ótýi tıis bolǵan. Pandemııaǵa baılanysty jarystar bir jylǵa keıinge qaldyrylyp, 2021 jyldyń 23 shildesi men 8 tamyzy aralyǵynda ótetin boldy. Sonymen qatar «Tokıo-2020» oıyndarynyń ataýy da saqtalǵan.