Japonııa Olımpıadanyń 2032 jylǵa aýystyrylatynyn joqqa shyǵardy

TOKIO. KYODO NEWS-QazAqparat – Japonııa juma kúni el úkimetiniń Tokıo qalasynda ótetin Olımpıada oıyndarynyń koronavırýsqa baılanysty keıinge qaldyrylyp, olardy 2032 jyly ótkizýge tyrysyp jatqany týraly sheshim qabyldady degen jańalyqty joqqa shyǵardy, dep habarlaıdy QazAqparat KYODO NEWS agenttigine silteme jasap.

Buǵan deıin brıtandyq The Times basylymy Japonııa úkimetindegi derekkózge silteme jasap, el úkimetiniń Tokıodaǵy Olımpıada oıyndaryn koronavırýsqa baılanysty keıinge qaldyrý kerek degen qorytyndyǵa kelgenin habarlaǵan bolatyn.

«Biz bul jańalyqty tolyqtaı joqqa shyǵaramyz», - dep málimdedi Japonııa mınıstrler kabıneti Bas hatshysynyń orynbasary Manabý Sakaı kezekti baspasóz máslıhaty kezinde.

Beısenbide Halyqaralyq Olımpıada komıtetiniń basshysy Tomas Bah KYODO NEWS agenttigine bergen onlaın-suhbatynda: «Qazirgi kezde 23 shilde kúni Tokıodaǵy Olımpıda oıyndary ashylmaıdy dep sanaýǵa esh negiz joq», - atap ótti.

HOK men Japonııa úkimetiniń Olımpıada oıyndaryn bıyl ótkizýge nıettenip otyrǵanyna qaramastan, vırýstyń taralýyna baılanysty eldegi jaǵdaı ýshyǵyp jatyr.

Eske sala ketsek, Japonııada Olımpıada oıyndary 2020 jyldyń jazynda ótýi tıis bolǵan, alaıda koronavırýsqa baılanysty bıylǵy jyldyń jazyna aýystyryldy. Jarystardyń 2021 jyldyń 23 shildesi men 8 tamyzy aralyǵynda ótýi kútilýde.