Japonııa ókili alǵash ret FIFA prezıdenttigine úmitker atandy
ASTANA. KAZINFORM — Japonııa fýtbol qaýymdastyǵynyń burynǵy prezıdenti Kodzo Tasıma FIFA prezıdenti laýazymyna óz kandıdatýrasyn resmı túrde usyndy. Onyń kandıdatýrasyn bes ulttyq fýtbol federatsııasy qoldaǵan. Bul týraly Informsports.kz jazdy.
68 jastaǵy Kodzo Tasıma qazir Japonııa fýtbol qaýymdastyǵynyń qurmetti prezıdenti ári 2015 jyldan beri FIFA keńesiniń múshesi. Ol uıym prezıdenttigine úmitker retinde tirkelýge nıet bildirgen alǵashqy japonııalyq ókil atandy.
FIFA prezıdenttigine úmitker bolý úshin keminde bes ulttyq fýtbol qaýymdastyǵynyń qoldaýyn alý qajet. Tasıma bul talapty oryndaǵanymen, endi onyń kandıdatýrasy belgilengen talaptarǵa sáıkestigi men adaldyǵy turǵysynan tekserýden ótýi tıis.
Qazirgi ýaqytta prezıdenttik saılaýǵa qatysýǵa nıetti ekenin málimdegen taǵy úsh úmitker bar. Olar — FIFA-nyń qazirgi prezıdenti Djannı Infantıno, Shveıtsarııa quramasynyń burynǵy kapıtany Ramon Vega jáne Frantsııa fýtbol federatsııasynyń basshysy Fılıpp Dıallo.
Djannı Infantıno FIFA-ny 2016 jyldan beri basqaryp keledi. Ol aldaǵy saılaýda taǵy bir merzimge prezıdent bolýdy kózdep otyr. Buǵan deıin onyń qarsylastary uıym basshylyǵyn basqarý júıesi men ashyqtyq máselelerine qatysty synǵa alǵan. Kodzo Tasıma da óz baǵdarlamasyndaǵy negizgi basymdyqtardyń biri retinde basqarý sapasy men ashyqtyqty arttyrýdy atady.
FIFA prezıdentin saılaý 2027 jylǵy 18 naýryzda Rabat qalasynda ótetin uıymnyń 77-kongresi aıasynda uıymdastyrylady. Saılaýǵa FIFA-ǵa múshe 211 ulttyq fýtbol qaýymdastyǵynyń barlyǵy qatysyp, daýys bere alady.
Buǵan deıin FIFA prezıdenti Djannı Infantıno kelesi jyly uıym basshysy qyzmetine qaıta saılaný úshin kandıdatýrasyn usynǵysy keletinin jazdyq.