Japonııa men Qazaqstan ekonomıka, bıznes jáne ekologııa salasynda aıtarlyqtaı ilgerileýge qol jetkizdi – Elshi
ASTANA. KAZINFORM – Astanada Japonııanyń 126-y Uly Mártebeli Imperatory Narýhıtonyń 64 jasqa tolǵan týǵan kúni atalyp ótildi. Qazaqstandaǵy Japonııa elshiligi uıymdastyrǵan saltanatty sharaǵa dıplomattar, Májilis depýtattary men basqa da qurmetti qonaqtar qatysty.
«Bıyl 23 aqpanda 64 jasqa tolǵan Japonııanyń 126-y Uly Mártebeli Imperatory Narýhıtonyń týǵan kúnin sizdermen birge atap ótý men úshin úlken mártebe. Bizdiń ortaq tilegimiz qandaı da bir jolmen Astanadan Tokıodaǵy mártebeli ımperator saraıyna jetedi dep shyn júrekten úmittenemin. Bizdiń Ulttyq kúnge arnalǵan qabyldaýdy Qazaqstanda úshinshi ret ótkizip otyrmyn. Japonııada 3 naýryzda toılanatyn qyzdar merekesine oraı «Hına-Nınge» qýyrshaqtaryn byltyrǵydaı kireberiske qoıdyq. Japonııada da, Qazaqstanda da áıelderdiń qoǵamdaǵy áleýetin odan ári tereńirek túısinýdi jalǵastyrýdamyz. Jaqynda Prezıdent Qasym-Jomart Toqaevtyń óte mańyzdy úrdisti ultty tutastaı alǵanda bolashaqqa ilgeriletýdegi zor áleýetiniń qaınar kózi retinde atap ótkeni esimde», - dedi Japonııanyń Qazaqstan Respýblıkasyndaǵy Elshisi Djýn ıAmada saltanatty sharanyń ashylýynda.
Sondaı-aq, elshi Qazaqstandy genderlik saıasatta kóshbasshy elderdiń biri ekendigin aıtty.
«Premer-Mınıstrdiń orynbasary Tamara Dúısenova, Mádenıet jáne aqparat mınıstri Aıda Balaeva, Densaýlyq saqtaý mınıstri Aqmaral Álnazarova, Qazaqstan Respýblıkasy Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan, Konstıtýtsııalyq sot tóraǵasy Elvıra Ázimova, Qazaqstan Respýblıkasynyń Prezıdentiniń keńesshisi – Prezıdenttiń halyqaralyq ekologııalyq yntymaqtastyq jónindegi arnaýly ókili Zúlfııa Súleımenova sekildi bedeldi hanymdary bar Qazaqstan osy saladaǵy álemdik kóshbasshylardyń biri», - deıdi ol.
Odan ári Djýn ıAmada myrza Qazaqstan men Japonııa arasyndaǵy qarym-qatynasqa toqtaldy.
«Álemdegi turaqsyz geosaıası jaǵdaıǵa qaramastan Japonııa men Qazaqstan ótken jyly óte jemisti jáne tabysty damýǵa qol jetkizdi. Byltyr shilde aıynda Japonııa-Qazaqstan Parlamenttik dostyq lıgasynyń tóraǵasy Endo myrza Astanaǵa kelip, birqatar mańyzdy kezdesý ótkizdi. Sonyń ishinde Májilis tóraǵasy Erlan Qoshanov jáne Senat tóraǵasy Máýlen Áshimbaev myrzamen kezdesip, sondaı-aq Prezıdent Q. Toqaev myrzamen izettilik júzdesý ótkizdi», - deıdi japon elshisi.
Odan bólek, elshi Japonııanyń Qarjy mınıstrliginiń halyqaralyq ister jónindegi vıtse-mınıstri Kandanyń Qazaqstanǵa sapary, sol kezdegi QR Premer-Mınıstrdiń orynbasary-Qarjy mınıstri Erulan Jamaýbaevtyń Japonııaǵa sapary, Japonııanyń buryn Parlamenttik Syrtqy ister mınıstri Eshıkavanyń, Japonııanyń Ekonomıka saýda jáne ındýstrııa mınıstri Kodzýkı myrzanyń elimizge sapary týraly aıtty.
«Japonııa men Qazaqstan ekonomıka, bıznes jáne ekologııa salasynda yntymaqtastyq aıtarlyqtaı ilgerileýge qol jetkizdi. Ásirese, ótken jyly qazanda «Birlesken nesıelik mehanızm» boıynsha yntymaqtastyq týraly memorandýmnyń jasalǵanyn atap ótýge bolady. Bul sátti kelisim boldy, memorandýmǵa Tokıoda ótken ekonomıkalyq yntymaqtastyq jónindegi Qazaqstan men Japonııanyń úkimettik jáne jeke sektorlarynyń birlesken komıssııasynyń otyrysy qarsańynda qol qoıyldy. Bul oqıǵa COVID-19 pandemııasyna jáne basqa da faktorlarǵa baılanysty 5 jyldyq úzilisten keıin oryn aldy», - deıdi D. ıAmada.
Onyń aıtýynsha, bıyl qańtarda Japonııanyń Ekonomıka, saýda jáne ındýstrııa mınıstri Saıto men Qazaqstan Respýblıkasynyń Energetıka mınıstri Almasadam Sátqalıev jasyl energetıkaǵa kóshýdi júzege asyrý boıynsha yntymaqtastyq memorandýmǵa qol qoıǵan.
«Arada úsh kún ótkennen keıin Astanada japon-qazaq bıznes forýmy sátti ótti. Memlekettik mınıstr Kodzýkıdiń joǵary atap ótken saparynyń maqsaty – ishinara, ekijaqty ekonomıkalyq qarym-qatynastaǵy osy mańyzdy oqıǵalarǵa baılanysty bolǵan edi», - deıdi ol.
