Japonııa men EO spýtnıktik júıe men qorǵanys yntymaqtastyǵyn damytpaq
ASTANA. KAZINFORM — Japonııa men Eýropalyq odaq AQSh-qa táýeldilikti azaıtý maqsatynda ózderiniń spýtnıktik jelisin qurýdy jáne qorǵanys-ónerkásiptik keshen salasynda yntymaqtastyq ornatýdy josparlap otyr, dep habarlaıdy TASS.
Bul týraly Nikkei gazeti Japonııa men EO arasyndaǵy 23 shildede Tokıoda ótetin sammıtte qabyldanýy josparlanǵan kelisim jobasyna silteme jasap habarlady.
Taraptar birlesip paıdalanylatyn shaǵyn spýtnıkter toptamasyn qurýǵa ýaǵdalaspaq. Sonymen qatar, bul salada memlekettik-jekemenshik áriptestik formaty da talqylanady. Atap aıtqanda, mańyzdy tehnologııalar men klımattyń ózgerýi jáne tabıǵı apattarǵa qarsy kúreske qatysty derekter almasý jóninde ortaq standarttar men erejeler ázirlenýi múmkin. Budan bólek, ǵaryshtyq qoqysty joıý boıynsha birlesken is-qımyldar talqylanady.
Japonııa men EO naqty ýaqyt rejıminde jumys isteıtin spýtnıktik toptyń bolýyn tsıfrlandyrýdy odan ári damytý úshin mańyzdy faktor dep sanaıdy. Alaıda bul salada Tokıo men Brıýssel AQSh pen Qytaıdan edáýir artta qalyp otyr. Japonııanyń Ekonomıka, saýda jáne ónerkásip mınıstrliginiń derekterine silteme jasaǵan Nikkei basylymy Illon Masktyń SpaceX kompanııasy 40 000 spýtnık ushyrýdy, al Qytaı 10 000 spýtnık iske qosýdy josparlap otyrǵanyn jazady. Al Eýropalyq odaq 290 spýtnık, Tokıo bolsa 2030 jyldardyń basyna qaraı «beske jýyq spýtnık» ıelenýdi kózdep otyr.
Osyǵan baılanysty Nikkei Japonııa men kóptegen EO elderi AQSh-tyń odaqtasy bola otyryp, aqparattyq tehnologııalar salasynda Vashıngtonǵa qatty táýeldi ekenin atap ótedi. AQSh prezıdenti Donald Tramptyń saıasaty ǵarysh salasyndaǵy yntymaqtastyqtyń bolashaǵyna qatysty kúmán týdyryp otyr. Sondyqtan Tokıo men Brıýssel óz ónerkásiptik áleýetin damytý maqsatynda birlesip áreket etkisi keledi.