Japonııa men AQSh zymyran ushyrý talaptaryn jeńildetedi
ASTANA. KAZINFORM — Japonııa men AQSh ǵarysh apparattaryn ushyrý erejelerin jeńildetý týraly kelisimge keldi. Elder tekserýdiń birqatar rásimin standarttaýdy josparlap otyr. Bul japon kompanııalaryna zymyrandaryn AQSh-taǵy ǵarysh aılaqtarynan, al amerıkalyq operatorlarǵa Japonııadaǵy ǵarysh aılaqtarynan ushyrýǵa múmkindik beredi. Bul týraly Japonııa úkimeti málimdedi, dep habarlaıdy Kazinform Kyodo agenttigine silteme jasap.
Yntymaqtastyq týraly memorandýmǵa Japonııanyń ulttyq ǵarysh saıasaty hatshylyǵy men AQSh Federaldyq avıatsııa basqarmasy qol qoıdy. Kelisim normatıvtik talaptardy jeńildetýdi jáne aqparat almasýdy keńeıtýdi de kózdeıdi.
— Biz túrli baǵytta damyp kele jatqan ǵarysh bıznesine beıimdelgen júıe qurǵymyz keledi, — dedi qujatqa qol qoıylǵannan keıin Japonııa hatshylyǵynyń bas dırektory Takatsýgý Rıýdzakı.
Qazir Japonııada birneshe ǵarysh aılaǵyn salý jobasy júzege asyrylyp jatyr. Olardyń qatarynda Kotı jáne Oıta prefektýralaryndaǵy jobalar bar. Yntymaqtastyq aıasynda eki el ǵarysh bıznesi operatorlaryna arnalǵan nusqaýlyq ázirlep, ǵarysh aılaqtaryna qoıylatyn naqty talaptardy belgileýdi josparlap otyr.
Eki eldiń jospary zymyran ushyrýmen ǵana shektelmeıdi. Japonııa men AQSh teńiz deńgeıinen shamamen 100 shaqyrym bıiktikte eki eldiń qalalary arasynda sýborbıtalyq ushýlar uıymdastyrý múmkindigin de qarastyryp jatyr.
Mundaı tehnologııalar bolashaqta áýe qatynasynyń ýaqytyn aıtarlyqtaı qysqartýy múmkin. Byltyr Japonııanyń týrıstik agenttigi 2030-jyldary Tokıo men AQSh qalalary, sonyń ishinde Nıý-Iork arasynda tikeleı kólik qatynasyn iske qosý josparlary bar ekenin habarlaǵan. Mundaı sapar shamamen bir saǵatqa sozylýy múmkin.
Eske salaıyq, buǵan deıin Úndistan alǵash ret jeke kompanııa ázirlegen Vikram-1 zymyranyn ushyrǵanyn jazǵanbyz.
