Japonııa men AQSh kóshbasshylarynyń alǵashqy kezdesýi aqpan aıynda ótýi múmkin
ASTANA. KAZINFORM - Japonııa premer-mınıstri Sıgerý Isıba men AQSh prezıdenti Donald Tramptyń alǵashqy kezdesýi 7 aqpanda Vashıngtonda ótýi múmkin. Qazirgi tańda eki el úkimetteri bul másele boıynsha sońǵy kelissózderdi júrgizýde, dep habarlaıdy Kyodo News aqparat agenttigi.
Kezdesýdiń basty maqsaty – Japonııa men AQSh arasyndaǵy odaqtyq qatynastardy nyǵaıtý. Eki el qorǵanys pen qaýipsizdik salasyndaǵy yntymaqtastyqty kúsheıtýge, sondaı-aq Qytaı men Soltústik Koreıaǵa qatysty birlesken ustanym qalyptastyrýǵa múddeli. Sonymen qatar, Japonııanyń Nippon Steel kompanııasynyń U.S. Steel-di satyp alý josparyna baılanysty ekonomıkalyq máseleler de talqylanady.
Tramp Japonııadan qorǵanysqa bólinetin shyǵyndy arttyrýdy talap etýi múmkin, al Isıba óz úkimetiniń bul baǵyttaǵy jańa saıasatyn túsindirýge nıetti. Sondaı-aq, ol Japonııanyń AQSh ekonomıkasyna iri ınvestor ekenin atap ótip, ınvestıtsııalardy keńeıtý josparyn usynbaq.
- Biz bul kezdesýdi tezirek ótkizýdi qalaımyz. Ashyq dıalog arqyly odaqtyq qatynastardy jańa deńgeıge kóteremiz, - dep málimdedi Isıba.
Buǵan deıin Japonııanyń ortalyq banki sońǵy 17 jylda mólsherlemeni eń joǵary deńgeıge kótergenin jazǵan bolatynbyz.