Japonııa men AQSh F-35 joıǵyshtaryna arnalǵan zymyrandardy birlesip óndiredi
ASTANA. KAZINFORM — Japonııa men AQSh Japonııa aýmaǵynda áýe-áýe sanatyndaǵy jetildirilgen orta qashyqtyqtaǵy zymyrandardy birlesip shyǵaratyn kásiporyn qurýǵa kelisti. Bul týraly Kazinform agenttigi Anadolu-ǵa silteme jasap habarlady.
Bul týraly Japonııanyń qorǵanys mınıstri Sınddzıro Koıdzýmı Fılıppınde ótken baspasóz máslıhatynda málimdedi. Ol Ońtústik-Shyǵys Azııa memleketteri qaýymdastyǵy (ASEAN) elderiniń qorǵanys mınıstrleri men seriktesteri qatysqan kezdesýge qatysyp jatyr.
Koıdzýmıdiń aıtýynsha, mundaı kelisimge AQSh qorǵanys mınıstri Pıt Hegsetpen kelissózder barysynda qol jetkizilgen.
Zymyran óndirisin Operation Supercharge birlesken bastamasy aıasynda uıymdastyrý josparlanyp otyr.
Japonııa mınıstri bul zymyrandardyń Japonııa men AQSh qarýly kúshteriniń qataryndaǵy besinshi býynǵa jatatyn F-35 joıǵysh ushaqtary úshin mańyzy zor ekenin atap ótti.
— Biz Japonııa men AQSh alıansynyń tejeý áleýeti men áreket etý múmkindikterin buryn-sońdy bolmaǵan qarqynmen ári jedel nyǵaıtýǵa kelistik, — dedi Koıdzýmı.
Ol sondaı-aq taraptar halyqaralyq quqyq ústemdigine negizdelgen erkin ári ashyq halyqaralyq tártipti qoldaıtynyn rastaǵanyn aıtty. Buǵan qosa, kúsh nemese qysym kórsetý arqyly qalyptasqan jaǵdaıdy birjaqty ózgertý áreketterine qarsy ekenin jetkizdi.
Eske salaıyq, buǵan deıin Japonııa men AQSh ǵarysh apparattaryn ushyrý erejelerin jeńildetý týraly kelisimge kelgenin habarlaǵan edik. Elder tekserýdiń birqatar rásimin standarttaýdy josparlap otyr. Bul japon kompanııalaryna zymyrandaryn AQSh-taǵy ǵarysh aılaqtarynan, al amerıkalyq operatorlarǵa Japonııadaǵy ǵarysh aılaqtarynan ushyrýǵa múmkindik beredi.
