Japonııa men AQSh arasyndaǵy tarıftik kelissózderde ilgerileý joq — Sıgerý Isıba

ASTANA. KAZINFORM — Japonııa premer-mınıstri Sıgerý Isıba seısenbi kúni Kanadada ótken G7 sammıti aıasynda AQSh Prezıdenti Donald Tramppen tarıf máselesi boıynsha júrgizilgen kelissózder barysynda ilgerileýge qol jetkizilmegenin málimdedi, dep jazady Sınhýa.

«Nıkkeı» iskerlik gazetiniń málimetinshe, kezdesýden keıin úkimet basshysy jýrnalısterge eki el arasynda bul máselege qatysty kózqaras aıyrmashylyqtary áli de bar ekenin jáne jan-jaqty kelisimge qol jetkizilmegenin aıtty.

Ol Japonııa men AQSh kelissózder barysynda aıtarlyqtaı kúsh jumsaǵanyn jáne mınıstrlerge dıalogty jalǵastyrýdy tapsyrǵanyn atap ótti. Alaıda Sıgerý Isıba kelisimge qashan qol jetkiziletini týraly naqty aqparat berýden bas tartty.

Qazirgi ýaqytta Japonııa AQSh tarapynan avtomobılder men olardyń qosalqy bólshekterine 25 paıyzdyq, al bolat pen alıýmınııge 50 paıyzdyq tarıfke tap bolyp otyr. Buǵan deıin mınıstrler deńgeıinde ótken kelissózder de aıtarlyqtaı nátıje bergen joq.

Eske salsaq, sáýir aıynda prezıdent Donald Tramp AQSh-tyń barlyq saýda seriktesteri úshin 10% tarıfti jáne óziniń «Amerıka birinshi kezekte» atty baǵdarlamasy aıasynda ózge ondaǵan memleketke barlyq salany qamtıtyn joǵary baj salyǵyn engizýdi qarastyratyn paketin usyndy. Tizimdi AQSh taýarlaryna 67 paıyz stavka qoıǵan Qytaı bastap tur. Bul elge tarıf 34 paıyz boldy. Sondaı-aq tizimde Taıland, Taıvan, Indonezııa, Shveıtsarııa, Ońtústik Afrıka, Úndistan, Ońtústik Koreıa, Malaızııa, EO jáne basqa elder bar.