Japonııa MAGATE-den Fýkýsıma atom elektr stantsııasyndaǵy sýdy teńizge jiberýge ruqsat aldy
ASTANA.QazAqparat – «Fýkýsıma» atom elektr stantsııasynan tazartylǵan sýdy muhıtqa shyǵarý adamdar men qorshaǵan ortaǵa bolmashy radıologııalyq áser etedi. Bul týraly uıymnyń baıandamasynda aıtylǵan, dep habarlaıdy QazAqparat Euronews-ke silteme jasap.
Japonııa MAGATE-den «Fýkýsıma» atom elektr stantsııasyndaǵy reaktordyń zaqymdalǵan energııa bloktaryn salqyndatý úshin paıdalanylǵan sýdy tógýge ruqsat aldy.
«Tazartylǵan sýdy muhıtqa aǵyzý adamdarǵa jáne qorshaǵan ortaǵa eleýsiz radıologııalyq áser etedi», - delingen uıym baıandamasynda.
2021 jyldyń sáýirinde japon bıligi «Fýkýsıma-1» sýyn arnaıy óńdeýden keıin muhıtqa birtindep jiberý josparyn jarııalady. 2021 jyly MAGATE bul josparlardy qaýipsizdik maqsatynda synaqtan ótkizýge kelisti.
Tokıonyń sheshimi kórshi elderdiń, sonyń ishinde Qytaıdyń, ásirese balyq ónerkásibimen aınalysýshylardyń narazylyǵyn týdyrdy, olar tutynýshylar bul aımaqta aýlanǵan kez-kelgen teńiz ónimderinen bas tartýy múmkin dep qaýiptendi.
Keıbir ǵalymdar mundaı qadamnyń uzaq merzimdi saldary anyq emes, sondyqtan sýdy aǵyzýdy keıinge qaldyrý kerek dep sanaıdy.
