Japonııa Qytaıdan vırýstyq pnevmonııanyń kelgenin rastady
TOKIO. Kyodo - QazAqparat – Beısenbi kúni Japonııa densaýlyq saqtaý mınıstrligi Qytaıdan kelgen er adamnyń koronavırýsqa tapsyrǵan testi oń nátıje bergenin jarııalady. Bul koronavırýs Japonııada birinshi ret tirkelip otyr, dep habarlaıdy QazAqparat Kyodo-ǵa silteme jasap.
Mınıstrliktiń málimetinshe, 30 jastaǵy er adam - Japonııanyń ońtústigindegi Kanagava prefektýrasynyń turǵyny. Ol jańa vırýsty pnevmonııa órship turǵan Qytaıdyń ortalyǵyndaǵy Ýhan qalasyna baryp, 6 qańtar kúni Japonııaǵa oralǵan. Mınıstrlik er adamnyń ótken jumada aýrýhanaǵa jatyp, sársenbi kúni densaýlyǵy jaqsarǵan soń shyǵarylǵanyn habarlady.
Budan buryn QazAqparat zerthanalyq zertteý nátıjeleri kórsetkendeı, Qytaıdyń Ýhan qalasyndaǵy beımálim vırýsty pnevmonııanyń órshýine jańa úlgidegi koronavırýs sebep bolǵanyn habarlaǵan bolatyn.
Bul týraly patogenge júrgizilgen testileý nátıjelerin baǵalaý tobyn basqarǵan qytaılyq sarapshy Sıýı Tszıango aıtyp berdi.
Taıaýda anyqtalǵan koronavırýs SARS (qatty asqynǵan respıratorlyq sındrom) jáne MERS (taıaýshyǵystyq respıratorlyq sındrom) atty aýrýlar týǵyzatyn belgili koronavırýs túrlerinen erekshe, dep sendirdi Qytaı ınjenerııa akademııasynyń akademıgi Sıýı.
Sarapshynyń pkirinshe, jańa vırýsty ári qaraı zertteý qajet.
Qytaıda barlyǵy 59 adamnan vırýsty pnevmonııa tabylyp, onyń ishinde jeteýi aýyr halde jatyr. 11 qańtarda Qytaıda atalmysh aýrýdan qaıtys bolǵan birinshi jaǵdaı tirkeldi. Ońtústik Koreıada bir adamnyń juqtyrǵany málim boldy.
