Japonııa koronavırýske test jasaıtyn robottar qurastyrýda
NUR-SULTAN-TOKIO. QazAqparat – Japonııalyq kompanııa medıtsına qyzmetkerleri arasynda koronavırýske shaldyǵý oqıǵalarynyń sanyn azaıtý maqsatynda PTR-test júrgizetin robottalǵan júıeni qurastyrýda, dep habarlaıdy «QazAqparat» HAA menshikti tilshisi.
Japonııalyq BAQ-tardyń málimetinshe, robottalǵan júıe birneshe robottan turatyn bolady. Birinshisi adamnan analız alady. Ekinshisi bıomaterıaldy zertteý qurylǵysyna salady. Al úshinshisi reagenttermen jumys isteıdi.
Robottardy «Kawasaki Heavy Industries» jáne «Sysmex»-tiń birlesken kompanııasy oılap tapqan jáne olar osynda qurastyrylmaq.
Japonııa kompanııasynyń ókilderi atap ótkendeı, basty element naýqastardan analız alý bolyp tabylady. Sebebi bul dárigerlerge COVID-19-ǵa PTR-testileýdi qashyqtan júrgizýge múmkindik beredi. Bul, óz kezeginde indetti juqtyryp alý qaýpin azaıtady.
Robottardyń óndirisi qolǵa alynǵan Kobe qalasynda bılik ókilderi kompanııaǵa 460 myń dollar kóleminde qarjylaı kómek kórsetpek. Sondaı-aq aýrýhanalar men ózge de mekemelerde synaq alańdaryn usynady.
