Úndistanda qoımada bolǵan jarylystan 20-dan astam adam qaza tapty

ASTANA. KAZINFORM — Gýdjarat shtatynyń Banaskanta aýdanyndaǵy Dısa qalasynyń shetindegi otshashý qoımasynda bolǵan jarylys saldarynan kem degende 21 adam qaza tapty, onyń ishinde 7-eýi bala, dep habarlaıdy The Indian Express. 

Oqıǵa seısenbi kúni jergilikti ýaqyt boıynsha tańǵy saǵat 9:30 shamasynda bolǵan. 

— Jarylystan ǵımarat qulaǵan. Onda aldyn ala málimet boıynsha otshashýlar zańsyz saqtalǵan jáne satylǵan, - dep habarlady jergilikti polıtsııa ókilderi. 

Sol kúni qoıma ıelerine adam óltirdi degen aıyp taǵyldy. Іs materıaldaryna sáıkes, olar órt sóndirý quraldaryn ornatpaı, iri kólemdegi pırotehnıkalyq zattardy zańsyz saqtaǵan. 

— Qaza bolǵandardyń 19-ynyń kim ekeni anyqtaldy, - dep habarlady sheneýnikter.

Polıtsııa qurbandar sanynyń artýy múmkin ekenin aıtty. 

Eske sala keteıik, buǵan deıin Malaızııada gaz qubyryndaǵy jarylystan 112 adam zardap shekkenin jazǵan edik.