Japonııa Qyrǵyzstanǵa kólik ınfraqurylymyn damytýǵa 4 mln dollar bóledi
ASTANA. KAZINFORM — Qyrǵyzstan men Japonııa kólik ınfraqurylymyn damytýǵa grant bólý týraly kelisimderge qol qoıdy. Qarajat jol tehnıkasyn satyp alýǵa baǵyttalady, dep habarlaıdy Kazinform agenttigi Kabar-ǵa silteme jasap.
Granttyq qoldaýdyń jalpy kólemi 533 mln japon ıenin nemese shamamen $4 mln bolady.
Qarajat jol tehnıkasyn satyp alýǵa jumsalady. Bul Qyrǵyzstannyń kólik ınfraqurylymyn damytý jáne jańǵyrtý jumystaryndaǵy tehnıkalyq múmkindikteri men tıimdiligin arttyrýǵa múmkindik beredi.
Japonııanyń jańa granttyq qoldaýy Qyrǵyzstannyń tehnıkalyq bazasyn odan ári nyǵaıtyp, ınfraqurylymdyq jobalardy iske asyrý tıimdiligin arttyrýǵa múmkindik beredi.
Kezdesý barysynda Qyrǵyzstan tarapy Japonııa úkimeti men halqyna, sondaı-aq eldiń áleýmettik-ekonomıkalyq damýyn kóp jyldan beri qoldap kele jatqan Japonııanyń halyqaralyq yntymaqtastyq agenttigine (JICA) alǵys bildirdi.
Taraptar sondaı-aq aldaǵy yntymaqtastyqtyń perspektıvalyq baǵyttaryn talqylady. Olardyń qatarynda densaýlyq saqtaý, energetıka, shaǵyn jáne orta bıznesti qoldaý, qalalyq kólik jáne tsıfrlandyrý salalaryndaǵy jobalar bar.
Sonymen qatar JDS baǵdarlamasyna erekshe nazar aýdaryldy. 2026 jyly bul baǵdarlama Qyrǵyzstanda jumys isteı bastaǵanyna 20 jyl tolady. Osy ýaqyt ishinde Qyrǵyz Respýblıkasynyń 300-den astam memlekettik qyzmetshisi Japonııanyń jetekshi ýnıversıtetterinde bilim alý múmkindigine ıe boldy.
Eske salaıyq, buǵan deıin Qyrǵyzstan Qytaıǵa qaryzyn 2035 jylǵa deıin tolyǵymen óteıtinin habarlaǵanbyz.
