Japonııa Qazaqstanǵa koronavırýsty anyqtaýǵa arnalǵan testilerdi tegin beredi
Japonııanyń Infektsııalyq aýrýlar boıynsha ulttyq ınstıtýty qazaqstandyq zerthanalarǵa koronavırýsty anyqtaýǵa arnalǵan testilerdi tegin tapsyrady. Qazaqstan Elshiliginiń ókilderi kúnshyǵys eliniń dárigerlerimen kezdesý ótkizip, osyndaı kelisimge kelgen.
Elimizge Japonııada turatyn otandastarymyz da kómektesip jatyr. Osy rette «Marbı Treıdıng ınk» kompanııasynyń bas dırektory Ábdibek Qalybek Qazaqstanǵa 200 qorǵanys kostıými men 5 myńnan asa medıtsınalyq maska berip jiberdi. «Pars Aýto» kompanııasynyń menedjeri Erkebulan Ápsemet te Otanyna 4 myńnan astam betperde jóneltken. Gýmanıtarlyq júkti «Tokıo – Nur-Sultan» tikeleı reısimen qazaqstandyq áýe kompanııa tegin jetkizdi. Sonymen qosa, respýblıkamyzdyń Japonııadaǵy elshiliginiń ókilderi beınekonferentsııa uıymdastyrǵan. Oǵan Qazaqstannyń Densaýlyq saqtaý mınıstrligi men Japonııanyń ınfektsııalyq aýrýlardyń ulttyq ısnstıtýtynyń qyzmetkerleri qatysqan. Taraptar koronavırýsty emdeý ádisterimen almasyp, onlaın konsýltatsııalardy jalǵastyrýǵa kelisti.
«Búginde Japonııada koronavırýsty juqtyrǵandardyń sany myńnan asady. Infektsııany shetelden alyp kelgender kóp. Aldaǵy birneshe apta Japonııa úshin kúrdeli kezeń bolýy múmkin. Óıtkeni bul vırýstyń jańa túri. Sondyqtan onymen qalaı kúresetinimizdi bilmeımiz. Ár el tıisti sharalardy qabyldap, zertteýler júrgizip jatyr. Osy rette biz ortaq konsýltatsııalar ótkizip otyrýymyz kerek», - dedi Japonııanyń aýrýlardy baqylaý jáne aldyn alý ortalyǵynyń dırektory Norıo Omagarı.
