Japonııa Qazaqstanǵa qandaı jobalardy atqarýǵa kómektesedi
ASTANA. KAZINFORM – Álemdegi geosaıası ahýalǵa baılanysty Qazaqstannyń tranzıttik áleýeti zoraıa tústi. Bul jóninde Japonııanyń Qazaqstan Respýblıkasyndaǵy Tótenshe jáne Ókiletti Elshisi ıAsýmas Iıdjım Óńirlik ekologııalyq sammıtte málimdedi.
– Japonııa Qazaqstanǵa qoldaý kórsetýge ýáde etken baǵdarlamalardyń biri – Orta dáliz jobasy. Ol Azııa men Eýropany kólik jáne týrıstik turǵyda baılanystyrmaq. Bul jobada Qazaqstan kólik toraby rólin atqarady. Sonyń arqasynda adam, kólik jáne aqparat aǵyny artpaq. Geosaıası jaǵdaılardyń shıelenisýine baılanysty qazir Reseı arqyly qatynaý múmkindigi shekteýli. Mundaı jaǵdaıda Qazaqstannyń kólik-logıstıka salasyndaǵy róli bıikteı tústi, - dedi elshi.
Biraq onyń sózinshe, Kaspıı teńiziniń sý deńgeıi tómendeı berse, Orta dáliz jobasy iske aspaı qalýy múmkin. Óıtkeni atalǵan marshýrtta teńizdi sý kólikterimen kesip ótý josparlanǵan. Sondyqtan elshiniń pikirinshe, Kaspııdi saqtaýdyń strategııalyq turǵyda da mańyzy zor.
– Japonııanyń sý resýrstaryn basqarý, tabıǵı apattardyń aldyn alý, qorshaǵan ortany qorǵaý baǵyttarynda baı tájirıbesi men ǵylym-bilimi bar. Sondaı-aq derekterdi jınaý, baqylaý jáne taldaý salasynda da tájirıbemiz mol. Japonııa bul sammıtke qatysyp otyrǵan barlyq elmen ekologııalyq máselelerdi sheshýde kúsh jumyldyrýǵa daıyn, - dedi ol.
Aıta keteıik, buǵan deıin Qazaqstan BUU-nyń FAO uıymymen birlesken baǵdarlamany iske asyratynyn jazǵanbyz.
