Japonııa Qazaqstanǵa densaýlyq saqtaýdy damytýǵa 7 mln dollardan astam granttyq qoldaý kórsetedi

ASTANA. KAZINFORM – Densaýlyq saqtaý mınıstri Aqmaral Álnazarova men Japonııanyń QR-daǵy Tótenshe jáne Ókiletti Elshisi Iıdzıma ıAsýsama Abaı oblysynda medıtsınalyq ınfraqurylymdy damytýǵa 1,087 mlrd ıen (7 mln AQSh dollary) mólsherinde japon grantyn berý týraly úkimetaralyq kelisimdi is júzinde iske asyrý maqsatynda qujatqa qol qoıdy. Bul týraly Densaýlyq saqtaý mınıstrligi habarlady.

Granttyq kómek «Semeı medıtsına ýnıversıteti» KeAQ ýnıversıtettik gospıtaline arnalǵan joǵary tehnologııalyq medıtsınalyq jabdyqtardy satyp alý úshin iske asyrylatyn bolady. Joba gospıtaldy magnıttik-rezonanstyq tomografty (MRT), kompıýterlik tomografty (KT), endoskopııalyq, reanımatsııalyq jáne ózge de joǵary tehnologııalyq jabdyqty qosa alǵanda, zamanaýı dıagnostıkalyq jáne emdeý júıelerimen jaraqtandyrýdy kózdeıdi.

Bul óńirlik deńgeıde, onyń ishinde ıadrolyq synaqtardyń saldarynan zardap shekken patsıentterge arnaıy áleýmettik jáne gýmanıtarlyq mańyzy bar mamandandyrylǵan jáne joǵary tehnologııalyq medıtsınalyq kómek kórsetý múmkindikterin edáýir keńeıtýge múmkindik beredi. Bul grantty iske asyrý densaýlyq saqtaý salasyndaǵy turaqty qazaq-japon yntymaqtastyǵynyń bir bóligi boldy.

Japonııa densaýlyq saqtaý júıesin nyǵaıtýǵa, bazalyq medıtsınalyq kómektiń qoljetimdiligin arttyrýǵa jáne óńirlik teńsizdikterdi qysqartýǵa baǵyttalǵan «Shóp tamyry» adam qaýipsizdigin qamtamasyz etý jónindegi óteýsiz kómek baǵdarlamasy sheńberinde Qazaqstanǵa qosymsha qoldaý kórsetedi.

Sonymen qatar medıtsınalyq bilim berý jáne kadrlar daıarlaý salasyndaǵy yntymaqtastyq belsendi damyp keledi. Ózara is-qımyl JICA jáne Young Leaders' baǵdarlamalary arqyly júzege asyrylady.

Semeı medıtsına ýnıversıteti Japonııanyń jetekshi ýnıversıtetterimen, sonyń ishinde Nagasaki University, Hiroshima University, Oita University, Shimane University jáne Kochi University-imen áriptestik jasady. Yntymaqtastyq akademııalyq utqyrlyqty, klınıkalyq taǵylymdamany, birlesken ǵylymı zertteýlerdi jáne oqytýshylarmen almasýdy qamtıdy.

Qazaqstannyń farmatsevtıkalyq jáne medıtsınalyq naryqtarynda búginde dárilik zattardyń 27 ataýy jáne japon óndirisiniń 445 medıtsınalyq buıymdary tirkelgen. Bul japon tehnologııalaryna degen senimniń joǵary deńgeıin jáne japon kompanııalarynyń elde turaqty bolýyn kórsetedi.

Buǵan deıin «Shóp tamyry» adam qaýipsizdigin qamtamasyz etý boıynsha óteýsiz kómek baǵdarlamasy sheńberinde Japonııa Jambyl oblystyq qan ortalyǵyna 6 68,790 AQSh dollary kóleminde grant bólgenin aıta ketken jón.

Bul aqshaǵa qan trombotsıtterin saqtaýǵa arnalǵan 5 apparat satyp alyndy. Buǵan deıin Japonııa Úkimeti bólgen granttarǵa Semeı qalasyndaǵy jedel járdem aýrýhanasyna medıtsına qyzmetkerlerin shaqyrtý júıesi satyp alyndy.

Akademık N.Batpenov atyndaǵy Ulttyq travmatologııa jáne ortopedııa ǵylymı ortalyǵynda kompıýterlik tomografııa kabıneti jáne basqalar ashyldy.

Klınıkalyq zertteýlerdi, jabdyqqa servıstik qyzmet kórsetýdi, JICA bilim berý baǵdarlamalaryn jáne jasandy ıntellekt negizinde telemedıtsınalyq sheshimderdi biriktire alatyn Japan-Kazakhstan Medical Hub qurý jobasy qarastyrylyp jatyr.

- QR Densaýlyq saqtaý mınıstrligi Japonııa úkimetine kórsetken qoldaýy, densaýlyq saqtaý salasyndaǵy ekijaqty yntymaqtastyqty dáıekti damytqany jáne el halqyna medıtsınalyq kómek júıesin nyǵaıtýǵa qosqan úlesi úshin shyn júrekten alǵys bildiredi. Qazaqstan medıtsınalyq týrızm jáne ońaltý, transplantologııa jáne aǵza donorlyǵy, densaýlyq saqtaýdy tsıfrlandyrý, jasandy ıntellekt jáne telemedıtsına, japondyq úlgidegi joǵary tehnologııalyq medıtsınalyq klınıkalar qurý sııaqty perspektıvalyq baǵyttar boıynsha Japonııamen densaýlyq saqtaý salasyndaǵy yntymaqtastyqty keńeıtýge ashyq, - delingen habarlamada.

Aıta keteıik, Densaýlyq saqtaý mınıstrligi oblystyq aýrýhanalardy jańartý josparyn usyndy.