Japonııa Qazaqstanǵa árkez ashyq boldy — japon ýnıversıtetiniń tuńǵysh qazaqstandyq vıtse-prezıdenti
ASTANA.KAZINFORM — Rıtsýmeıkan Azııa-Tynyq muhıty ýnıversıtetiniń tuńǵysh qazaqstandyq vıtse-prezıdenti Serik Meıirmanov Silk Way telearnasynyń tilshisine bergen suhbatynda Prezıdent Qasym-Jomart Toqaevtyń Japonııaǵa sapary týraly pikir bildirdi, dep habarlaıdy Kazinform agenttigi.
Ol Memleket basshysynyń Kúnshyǵys eline saparynyń mańyzdylyǵyn atap ótti. Onyń aıtýynsha, Japonııa Qazaqstanmen yntymaqtastyqqa árqashan oń kózqarasta boldy.
— Prezıdent Toqaevtyń sapary biz úshin de, Qazaqstan úshin de óte mańyzdy, sebebi Japonııa árqashan Qazaqstandy strategııalyq seriktes retinde qarastyrdy. «Ortalyq Azııa + 5» formatyn alǵash ret Japonııa 2004 jyly usynǵan. Sondyqtan, men Japonııa árqashan seriktestikke oń kózqaraspen qarady dep sanaımyn. Bul sapar eki el arasyndaǵy qarym-qatynasty damytýǵa jańa serpin beredi dep oılaımyn. Meniń mansabym da sátti damydy, sebebi men Qazaqstanda jaqsy bilim aldym. Meniń óz otanymda alǵan bilimim bul jaqta qajetime jarady jáne moıyndaldy, — dep atap ótti Serik Meıirmanov.
Meıirmanov sonymen qatar Japonııadaǵy qazaq dıasporasy týraly aıtty. Onyń aıtýynsha, jastardyń kópshiligi azııalyq zertteýler men bıznes salalaryndaǵy ýnıversıtetterde bilim alady.
— Munda aǵa býyn ókilderi de bar, dárigerler, densaýlyq saqtaý mamandary jáne muǵalimder bar. Sondaı-aq Japonııada tabysty damyp kele jatqan keıbir bıznesmender bar, — dep bólisti ol.
Ol sondaı-aq ekijaqty yntymaqtastyq týraly aıtty. Prezıdenttiń sapary kúni eki tarap bilim berý týraly kelisimge qol qoıady. Serik Meıirmanov Rıtsýmeıkan Azııa-Tynyq muhıty ýnıversıtetiniń ókili.
— Búgin bizdiń ýnıversıtetimiz ben Joǵary bilim jáne ǵylym mınıstrligi arasyndaǵy alǵashqy kelisimge qol qoıylady, bul eki el arasyndaǵy bilim berý tehnologııalarymen almasýǵa serpin beredi. Sondyqtan, meniń oıymsha, bolashaq óte jarqyn, — dep túıindedi Meıirmanov.
Esterińizge sala keteıik, Qasym-Jomart Toqaev 17 jeltoqsanda Japonııaǵa resmı saparmen bardy.
Memleket basshysynyń Japonııaǵa resmı sapary kezinde qol qoıylýy josparlanǵan kommertsııalyq kelisimderdiń jalpy quny 3,7 mıllıard dollardan asady.
Prezıdent Qasym-Jomart Toqaev buǵan deıin Japonııada ártúrli salalarda oqyp nemese jumys istep júrgen qazaqstandyq azamattarmen kezdesken.