Japonııa Qarýly kúshteri áıelderge qatysty sońǵy shekteýdi alyp tastady

ASTANA. KAZINFORM – 1 tamyzdan bastap Japonııanyń Qorǵanys mınıstrligi áıel áskerı qyzmetshilerge ıadrolyq, bıologııalyq jáne hımııalyq qarýdan qorǵaný bólimshelerinde qyzmet etýge ruqsat berdi. Bul – eldegi Ózin-ózi qorǵaý kúshterindegi áıelderge qatysty sońǵy shekteýdiń joıylǵanyn bildiredi, dep habarlaıdy Kyodo.

Atalǵan bólimsheler radıoaktıvti, bıologııalyq jáne hımııalyq zattarmen lastanǵan aýmaqtarda barlaý júrgizý men zalalsyzdandyrý jumystaryn atqarady. Buryn bul baǵytta áıelderdiń qyzmet etýine tyıym salynǵan bolatyn. Sebebi, mundaı jaǵdaıda bedeýlik qaýpi joǵary sanalǵan.

Alaıda tehnologııalyq jetistikter men arnaıy qorǵanys quraldarynyń damýy bul qaýiptiń aldyn alýǵa múmkindik berip otyr. Mınıstrlik áıelderdiń arnaıy kólikter men qorǵanys jabdyqtaryn paıdalaný arqyly mundaı jumystardy qaýipsiz atqara alatynyna senimdi.

2011 jyly jer silkinisi men tsýnamıden keıin oryn alǵan «Fýkýsıma-1» atom elektr stantsııasyndaǵy apattan soń Japonııa dezaktıvatsııalaý jumystaryna kadr tapshylyǵyn sezingen bolatyn.

Japonııa áıelderdiń armııada qyzmet etýine baılanysty shekteýlerdi birtindep alyp tastap keledi. 1993 jyly Qorǵanys mınıstrligi genderlik teńdikti qoldaý maqsatynda áskerı qyzmettegi saıasatyn qaıta qarap, áıelderdiń aýyr fızıkalyq júktemesi bar mindetterdi oryndaýyna ruqsat berdi.

2015 jyldan bastap áıelderge joıǵysh jáne barlaý ushaqtaryn basqarýǵa múmkindik berildi. 2017 jyly Sodrýjestvo elderiniń Ózin-ózi qorǵaý kúshteri áıelderdiń soǵys tehnıkasyn basqarýyn keńeıtti, al 2018 jyly Teńiz kúshteri olarǵa sýasty qaıyqtary ekıpajyna múshe bolýǵa ruqsat berdi.

Aıta keteıik, buǵan deıin Japonııa parlamentiniń joǵarǵy palatasyna rekordtyq sany áıel depýtattar saılanǵan bolatyn.