Japonııa ınjenerlik mamandyqtardaǵy áıelder úlesin eki esege arttyrmaq
ASTANA.KAZINFORM — Japonııa úkimeti áıelderdiń múmkindikterin keńeıtýge baǵyttalǵan jańa saıasatty bekitti, dep habarlaıdy Jiji Press.
Qujatta ýnıversıtetterdegi ınjenerlik mamandyqtarda oqıtyn qyzdardyń úlesin 2025 jylǵy 18 paıyzdan 2040 jylǵa qaraı 36 paıyzǵa deıin arttyrý maqsaty kózdelgen.
El úkimeti jasandy ıntellekt, jartylaı ótkizgishter óndirisi jáne aeroǵarysh salasy sekildi strategııalyq mańyzy bar 17 baǵytta áıelderdiń qatysýy men mansaptyq ósýi jetkiliksiz deńgeıde ekenin moıyndady.
— Áıelderdiń belsendi qatysýyn arttyrý arqyly Japonııanyń kadrlyq áleýetin nyǵaıtý úshin osy saıasatta kórsetilgen sharalardy jedel júzege asyramyz, — dedi Premer-mınıstr Sanae Takaıtı genderlik teńdikti ilgeriletý jónindegi shtabtyń birlesken otyrysynda.
Jańa saıasat aıasynda úı sharýasyn júrgizý jáne bala kútimi qyzmetterin paıdalanýdy qoldaýǵa arnalǵan salyqtyq jáne ózge de jeńildikter qarastyrylady. Bul áıelderdiń jumysyn, bala tárbıesin jáne jaqyndaryna kútim jasaýdy qatar alyp júrýine múmkindik beredi.
Sonymen qatar bılik ókilderi resmı qujattarda áıelderdiń qyz kezindegi tegin paıdalanýǵa múmkindik beretin zańnamalyq ózgeristerdi qarastyrmaq. Bul bastamany Premer-mınıstr burynnan qoldap keledi.
Buǵan deıin Japonııa halyqaralyq týrıstik salyqty 3000 ıenge deıin kóteretini týraly jazǵan edik.
