Japonııa Imperatorynyń tólqujatyna qatysty qupııa qaýly jaryqqa shyqty
ASTANA. QazAqparat - Japonııa SІM el ımperatoryna qatysty birqatar qujattardyń qupııasyn ashty, dep habarlady ITAR-TASS.
Eldiń syrtqy ister mınıstrligi buǵan deıin qupııa bolyp kelgen qujatty jarııa etti. Onda Japonııa ımperatory men onyń zaıybynda shetelge shyǵatyn tólqujat bolýǵa mindetti emes degen arnaıy qaýly bar ekeni kórsetilgen.
Qaýlyny 1971 jyly 10 mamyrda Japonııa Syrtqy saıası vedomstvosy qabyldaǵan. «Tıisti qujattardy ımperator men ımperatrıtsaǵa berýdiń esh reti joq», - delingen onyń mátininde. Onda sondaı-aq, Konstıtýtsııaǵa sáıkes, ımperator - Japonııanyń basty sımvoly sondyqtan, ımperator úshin «qarapaıym azamattar ótetin belgilengen vızalyq rásimnen ótý óte orynsyz jaǵdaı» dep jazylǵan.
Sol zamanda japon monarhyna pasport kerek, kerek emestigin uzaq talqylaǵan Syrtqy saıasat mekemesi «Qupııa» tańbasy soǵylǵan qaýlyny qabyldaǵan. Qaýly 43 jyl ótken soń ashylyp otyr. Qazirgi ýaqytta da ımperator Akıhıto men onyń zaıyby Mıtıko halyqaralyq saparlarǵa shyqqanda tólqujat paıdalanbaıdy. Alaıda, ımperator otbasynyń basqa múshelerine qoldanystaǵy normalarǵa sáıkes, dıplomattyq qujattar beriledi. Japonııa tarıhynda Imperator otbasy tarıhynda alǵashqy ret shetelge Hırohıto shyqqan. Ol 1971 jyly Eýropanyń birneshe elin aralady, delingen sheteldik aqparatta.
