Japonııa ımperatorlyq áýlet týraly zańǵa ózgeris engizbek
ASTANA. KAZINFORM – Japonııa parlamenti Imperatorlyq áýlet týraly zańdy reformalaý jónindegi usynystardy ázirleýdi aıaqtady. El bul zańǵa ondaǵan jyldan keıin alǵash ret ózgeris engizbek, dep habarlaıdy Kyodo agenttigi.
Qujat eki palatanyń barlyq 13 saıası partııasy men fraktsııasynyń qatysýymen ótken partııaaralyq konsýltatsııalar qorytyndysy boıynsha daıyndaldy. Ony tómengi palata spıkeri Eısýke Morı premer-mınıstr Sanae Takaıtıge tapsyrdy.
Túzetýlerdi qazirgi parlament sessııasy aıaqtalatyn 17 shildege deıin qabyldaý josparlanyp otyr. Usynystar eki negizgi ózgeristi qamtıdy.
Birinshisi – ımperatorlyq otbasy múshesi sanalatyn áıelderge qarapaıym azamatqa turmysqa shyqqannan keıin de óz mártebesin saqtaýǵa múmkindik berý. Qoldanystaǵy 1947 jylǵy zań boıynsha olar nekege turǵan sátten bastap bul mártebeden avtomatty túrde aıyrylady.
Sonymen qatar olardyń jubaılary men balalaryna ımperatorlyq mártebe berile me degen másele ázirge ashyq kúıinde qalyp otyr.
Ekinshi usynys – ımperator áýletiniń taratylǵan 11 tarmaǵynan shyqqan, erler jelisi boıynsha ımperatorlardyń urpaǵy sanalatyn er adamdardy asyrap alýǵa ruqsat berý.
Sonymen birge reformada shekteýler de bar. ıAǵnı asyrap alynǵan adamdar taq muragerligi quqyǵyna ıe bolmaıdy, al áıel adamnyń taqqa otyrý múmkindigi týraly másele qujatta qarastyrylmaǵan. Taq muragerligi máselesi Japonııada erekshe ózekti bolyp otyr.
Qazirgi ýaqytta 66 jastaǵy ımperator Narýhıtonyń nebári úsh murageri bar: onyń inisi taq murageri hanzada Fýmıhıto (60 jasta), jıeni hanzada Hısahıto (19 jasta) jáne aǵasy hanzada Hıtatı (90 jasta).
Tómengi palata spıkeriniń orynbasary Keııtı Isııniń aıtýynsha, taqtyń Hısahıtoǵa berilý jospary «ózgermeıtin qaǵıda» bolyp qala beredi, al muragerliktiń odan keıingi jelisi bolashaqta talqylanady.
Bılik pen oppozıtsııadaǵy jetekshi partııalardyń kópshiligi qoldaǵan kelisilgen usynys negizinde úkimet zańǵa túzetýler engizý týraly zań jobasyn ázirleýge kirisedi.
