Japonııa halqy bes jylda 3,17 mıllıon adamǵa azaıǵan
ASTANA. KAZINFORM – Japonııanyń jalpy halqy, onyń ishinde shetel azamattary da bar, 2025 jylǵy 1 qazanda 122 972 528 adamdy qurady. Bul 2020 jylǵy sanaqpen salystyrǵanda 3 173 571 adamǵa nemese 2,5%-ǵa az, dep habarlaıdy JIJI Press agenttigi.
Bul – 1920 jyldan beri bes jyl saıyn ótkiziletin halyq sanaǵynda tirkelgen qatarynan úshinshi tómendeý.
Japonııa azamattarynyń sany 3,5%-ǵa azaıyp, 119 131 935 adam boldy. 2020 jylǵy sanaqta bul kórsetkish 1,4%-ǵa tómendegen edi.
Al eldegi shetel azamattarynyń sany kerisinshe 39,8%-ǵa ósip, rekordtyq 3 840 039 adamǵa jetti.
Shetel azamattarynyń arasynda Qytaı azamattary eń kóp úlesti – 24%-dy qurady. Odan keıin Vetnam azamattary – 15,9%, al Ońtústik jáne Soltústik Koreıa azamattary 10,4% boldy. Aldyńǵy sanaqta koreıalyqtar 15,8% úlespen ekinshi orynda turǵan, al vetnamdyqtardyń úlesi 13,9% bolǵan.
Japonııanyń jalpy halqynyń 59 772 092-si er adamdar, 63 200 436-sy áıelder. 65 jastan asqan turǵyndardyń úlesi 28,5%-dan 29,4%-ǵa ósken.
Aıta keteıik, buǵan deıin Japonııada 100 jastan asqan turǵyndar sany rekordtyq deńgeıge jetkeni habarlanǵan edi.
