Japonııa halyqaralyq týrıstik salyqty 3000 ıenge deıin kóteredi
ASTANA. KAZINFORM — Japonııa úkimeti 1 shildeden bastap halyqaralyq týrıstik salyq mólsherin 1000 ıennen 3000 ıenge deıin arttyrady.
Kyodo agenttiginiń habarlaýynsha, atalǵan salyq áýe bıletteriniń qunyna engizilip, áýe kompanııalary arqyly alynady. Túsken qarajat týrısterdiń shamadan tys shoǵyrlanýynan týyndaıtyn máselelerdi sheshýge jáne týrıstik ınfraqurylymdy damytýǵa baǵyttalmaq.
Jańa erejege sáıkes, Japonııaǵa kelgennen keıin 24 saǵat ishinde elden shyǵatyn tranzıttik jolaýshylar men eki jasqa tolmaǵan balalar bul salyqtan bosatylady. Al 30 maýsymǵa deıin bılet satyp alǵan jolaýshylar úshin burynǵy 1000 ıen mólsherlemesi saqtalady.
Ótken jyly halyqaralyq týrıstik salyqtan túsken túsim shamamen 49 mlrd ıen bolǵan. Salyq mólsherlemesi kóterilgennen keıin bul kórsetkish jylyna 130 mlrd ıenge deıin jetedi dep kútilýde.
Japonııa bıligi jınalǵan qarajatty týrıster kóp shoǵyrlanatyn aımaqtardaǵy júktemeni azaıtýǵa, tanymal týrıstik oryndardaǵy ınfraqurylymdy jaqsartýǵa, sondaı-aq saıahatshylardy óńirlerge tartýǵa baǵyttalǵan jobalardy qoldaýǵa jumsamaq.
Sońǵy jyldary Japonııaǵa keletin sheteldik týrıster sanynyń aıtarlyqtaı artýyna baılanysty eldiń birqatar óńirinde «artyq týrızm» máselesi ózekti bolyp otyr. Úkimet jańa sharalar týrıstik salanyń turaqty damýyna yqpal etedi dep esepteıdi.
Buǵan deıin Japonııa úkimeti shilde aıynan bastap shetel azamattary úshin bir rettik vıza alýǵa ótinish berý alymyn bes esege — 3000 ıennen 15 000 ıenge (shamamen 90 AQSh dollary) deıin arttyrý týraly sheshim qabyldaǵanyn habarlaǵan edik.
