Japonııa halal naryǵyna shyǵa bastady
ASTANA. 16 sáýir. QazAqparat - Sıntoıstik Japonııa ózderi úshin halal naryǵyn ashty. Japondyqtar endigi jerde álemdik halal naryǵynda óz úlesine ıe bolýdyń joldaryn izdestirip jatyr.
Buǵan japondardyń halal qaýymdastyǵy muryndyq bolýda. Jýyrda Malaızııanyń ıslam damý departamenti atalmysh uıymdy halal sertıfıkatyn beretin quzyrly organ retinde moıyndady, dep jazady muslim.kz saıty.
«Japondyqtar halal ındýstrııasynda bıznestiń jańa baǵytyn belgilep, halal ónim óndirýshilermen saýda qatynasyn ornatýǵa múddeli bolyp otyr. Máselen, biz japondyqtardyń qus etin Taılandtan aldyratynyn baıqadyq. Olar tek halaldy ǵana qalaıdy. Tokıoda jáne ózge qalalarda halal meıramhanalar kóptep ashylýda. Bul úrdis, tipti, sánge kirdi dese de bolady», - dedi Chýlalongkorna (Bangkok) ýnıversıtetindegi halal ǵylymdary ortalyǵynyń dırektory, professor Vınaı Dıahlan Inside Investor-ǵa bergen suhbatynda.
Saıttyń jazýyna qaraǵanda, nanym-senimi jaǵynan sıntoıstik-býddalyq turǵyndardyń qarasy kóp Japonııada 120 myń musylman tirshilik keship jatyr. Alaıda, olardyń basynda da sheshimin tappaǵan másele jetip artylady. Eń aldymen, halal azyq-túlik tabýda qıyndyq kórip otyr. Japondyqtardyń halal uǵymynan habary shamaly. Dese de, sońǵy jyldary Japonııadaǵy musylmandardyń qatary syrttan keletin dindes baýyrlardyń esebinen kóbeıip keledi. Osyǵan oraı, bul elde halal ónimderine degen suranys ta artýda.
Toqtala ketetin jaıt, 2012 jyldyń jeltoqsan aıynda Japonııa halal qaýymdastyǵy mısonyń soıa pastasyn óndirýshilerge halal sertıfıkatyn berdi. Mıso japon taǵamdarynyń dámin kirgizetin dástúrli qospa bolyp tabylady.
«Mundaı ónimderge halal sertıfıkatyn berý musylman elderiniń turǵyndaryna japon as mázirimen tanysyp, dámin tatyp kórýge múmkindik beredi ári japon óndirýshileriniń halal ındýstrııasyna den qoıýyna sebepker bolady», - dedi Japon halal qaýymdastyǵynyń tóraǵasy Hınd Hıtomı Remon (Hind Hitomi Remon).
Onyń aıtýynsha, sońǵy 10 jyldyń ishinde halal as mázirin usynatyn meıramhanalardyń sany kúrt artqan. Qazirgi ýaqytta el aýmaǵynda 200-den asa osyndaı meıramhana bar kórinedi.
Joǵary oqý oryndarynyń kooperatıvtik qaýymdastyǵynyń ulttyq federatsııasy keltirgen derekke qaraǵanda, 7 birdeı ýnıversıtettiń ashanasy musylman stýdentterge halal taǵamdar usynady.
Musylman týrısterdi kóptep tartý úshin Osaka qalasynda Miyako International Tourist atty halal týrıstik agenttigi qurylǵan eken. Onyń qojaıyny Musa Hıdeshı Matsýıdiń aıtýynsha, bul mekeme jan-jaqty halal qyzmetin kórsetetin Japonııadaǵy jalǵyz týragenttik bolyp tabylady.
