Japonııa Gavaıdaǵy orman órtinen zardap shekkenderge 2 mln dollar qarjy bóledi

TOKIO. QazAqparat – Japonııa úkimeti sársenbide Gavaıdaǵy Maýı aralynda alapat orman órtinen zardap shekkenderge gýmanıtarlyq kómek retinde 2 mln dollar kóleminde qarjy bóletinin málimdedi, dep habarlaıdy QazAqparat Kyodo aqparat agenttigine silteme jasap.

Kómek amerıkalyq Qyzyl Krest jáne Japan Platform kommertsııalyq emes uıymy arqyly beriledi.

«Japonııa men Gavaıdyń dostyq qarym-qatynas ornatqanyna talaı jyl boldy», - dedi tilshilerge Japonııanyń Syrtqy ister mınıstri Esımasa Haıası. Japonııanyń Gonolýlýdaǵy Bas konsýldyǵynyń málimetinshe, aralda júzdegen japondyq azamat turady. Olardyń arasynda zardap shekkender týraly derek bolǵan joq.

Jergilikti bılik seısenbide Maýı aralynda órt saldarynan qaza tapqandar sany 106-ǵa jetti dep málimdedi. Amerıkalyq BAQ-tyń habarlaýynsha, bul 1918 jyly eldiń Mınnesota shtatynda júzdegen adamnyń ómirin qıǵan tabıǵı apattan keıingi eń joıqyn órt boldy.

Buǵan deıin Gavaı gýbernatory Djosh Grın órt saldarynan 1 300-ge jýyq adam habar-osharsyz joǵalǵanyn aıtqan. Aq úıdiń habarlaýynsha, prezıdent Djo Baıden men birinshi hanym Djıll Baıden dúısenbide Maýı aralyna baryp, tabıǵı apattan zardap shekkendermen, sondaı-aq jergilikti bılik ókilderimen kezdesedi.

AQSh-tyń Tótenshe jaǵdaılar jónindegi federaldy agenttiginiń esepteýinshe, Lahaına qalasyndaǵy zardap shekken aýdandardy qalpyna keltirý úshin shamamen 5,52 mlrd dollar qajet.