Japonııa fermerlerdi robottarmen almastyrýǵa 37 mıllıon dollar bólmek
ASTANA. QazAqparat - Japonııa fermerler sharýashylyqtarynyń qyzmetkerlerin robottarǵa jáne ushqyshsyz tehnıkaǵa almastyrý baǵdarlamasyn júzege asyrýǵa kiristi, dep habarlady Bloomberg.
Biraq ta adamdardy qysqartý josparlanyp otyrǵan joq, al tehnıka zeınet demalysyna shyǵatyn adamdardy ǵana aýystyrady. Jańa baǵdarlamanyń bastalǵany týraly Japonııa aýyl sharýashylyǵy mınıstri Hıroshı Daıdo G7 boıynsha áriptesterimen Nııgate prefektýrasynda azyq-túlikke suranystyń ósýin talqylaý barysynda málimdedi.
Hıroshı Dvaıdonyń túsindirýinshe, Japonııadaǵy fermerlerdiń orta jasy 67 jas. Jyl asqan saıyn ózderiniń ornyn basatyn adamdardy tabý qıyndap barady, al jastar jermen jumys jasaýǵa qulyqsyz. Sondyqtan da robottardy aýyl sharýashylyǵynda belsendi paıdalaný bul saladaǵy jumys qoly jetispeýi problemasynan qutylýǵa múmkindik beredi.
Mınıstrdiń aıtýynsha, osy baǵdarlamany júzege asyrýǵa bir jylda 4 mlrd. ıen (37 mıllıon dollar) jumsalatyn bolady. Qarajat aýyl sharýashylyǵy robot tehnıkasyn engizýge, sondaı-aq robottardyń jańa 20 úlgisin jasaýǵa ketedi. Sondaı-aq egin jınaý kezeńinde shabdalynyń pisken jemisterin anyqtaıtyn robottar shyǵarý da kózdelýde.
