Japonııa dron qoldanýǵa qatysty erejelerdi qatańdatty
ASTANA. KAZINFORM – Japonııa negizgi nysandardyń aınalasynda drondarǵa arnalǵan ushýǵa tyıym salynǵan aımaqtardy keńeıtetin, shekteýli radıýsty shamamen 300 metrden 1000 metrge deıin arttyratyn zań qabyldady, dep habarlaıdy Kyodo.
Jańa shekteýler qoldanylatyn aýmaqtardyń tizimi ázirge jarııalanǵan joq. Alaıda qorǵalatyn nysandar qataryna Imperator saraıy, premer-mınıstr rezıdentsııasy jáne AQSh elshiligi kiredi dep josparlanyp otyr.
Jańa erejelerge sáıkes, jekelegen nysandar premer-mınıstr, ımperator nemese sheteldik kóshbasshylar qatysatyn rásimder men basqa da is-sharalar kezinde shekteýler aımaǵyna ýaqytsha qosylýy múmkin.
Qazirgi ýaqytta bılik organdary dron «qyzyl aımaq» dep atalatyn belgilengen mańyzdy orynnyń ústinen tikeleı ushqan jaǵdaıda ǵana dereý shara qoldana alady.
Drondy «sary aımaqta» nemese ushýǵa tyıym salynǵan aımaqta ushyrý alty aıǵa deıin bas bostandyǵynan aıyrý nemese 500 myń ıenge (3120 dollar) deıin aıyppul salýmen jazalanady.
Bul sharalar – lańkestikke qarsy kúres sharalarynyń bir bóligi.
Drondardy paıdalanýdyń kedergi bolýyna jol bermeý úshin úkimet onlaın kartalarda shekteýli aımaqtardy kórsetedi.
Aıta keteıik, AQSh Qytaıdyń keıbir oıynshyq drondaryn ımporttaýǵa ruqsat berdi.
