Japonııa daýly aýmaqqa teńiz platformasyn salǵany úshin Qytaıǵa narazylyq bildirdi

ASTANA. KAZINFORM – Japonııa úkimeti Shyǵys-Qytaı teńiziniń daýly aýmaǵynda jańa qurylǵy salý josparyna baılanysty Qytaıǵa narazylyq bildirdi. Bul týraly Japonııa mınıstrler kabınetiniń bas hatshysy Esımasa Haıası málimdedi, dep jazad TASS.

- Biz Qytaıdyń Shyǵys-Qytaı teńizinen shyǵysqa qaraı taǵy bir qurylǵy ornatý nıetin bilemiz jáne olardyń erekshe ekonomıkalyq aýmaqtary men qurlyqtyq bóligi naqty bólinbeı turyp, birjaqty áreketterge baryp jatqanyna qynjylyp otyrmyz, - dedi ol. Osy rette ol Qytaıǵa dıplomatııalyq arnalar arqyly qarsylyq bildirilgenin atap ótti.

Tokıo Qytaıdyń áreketterine baılanysty osyndaı narazylyqtardy udaı bildirip otyrady.

Japondyqtardyń pikirinshe, Qytaı eki eldiń erekshe ekonomıkalyq aımaqtaryn bóletin syzyqtyń boıynda burǵylaý jumystaryn júrgizip jatyr.

Japon úkimeti muny Qytaıdyń teńiz túbindegi ken oryndarynan tabıǵı gazdy óndirý áreketi dep sanaıdy. Atalǵan ken oryndaryn ıelenýge Japonııanyń da quqy bolýy múmkin.

Japon tarapynyń málimetinshe, Qytaı bul aýdanda 20 turaqty burǵylaý qondyrǵysyn paıdalanyp otyr.

Qytaı Japonııa usynǵan eki eldiń ekonomıkalyq aımaqtaryn shekteý syzyǵyn moıyndamaıdy jáne bul syzyq áldeqaıda shyǵysqa — Japonııanyń ońtústigindegi Okınava aralyna deıin ótýi kerek dep esepteıdi. Halyqaralyq quqyqqa sáıkes, mundaı daýly máseleler eki el arasyndaǵy kelisim arqyly sheshilýi kerek.

Aıta keteıik, 2008 jyly Tokıo men Beıjiń Shyǵys Qytaı teńizindegi gaz ken oryndaryn birlesip ıgerý týraly kelisimge qol qoıǵan bolatyn. Alaıda bul másele boıynsha kelissózder 2010 jylǵy oqıǵadan keıin toqtatyldy. Sol kezde Japonııanyń jaǵalaý kúzeti Senkaký (qytaısha ataýy — Dıaoıýıdao) araldary mańynda Qytaıdyń balyq aýlaý kemesin ustaǵan. Bul araldar Japonııa men Qytaı arasynda aýmaqtyq daýǵa sebep bolyp otyr.

Osyǵan deıin Qytaıdyń sırek kezdesetin metaldarǵa baqylaýdy kúsheıtetini týraly jazdyq.