Japonııa COVID-19-ǵa qarsy úshinshi ekpeni engizýdi bastaýy múmkin

TOKIO. Kyodo-QazAqparat – Juma kúni eldiń Densaýlyq saqtaý mınıstrligi Japonııa osy jyldyń sońyna qaraı adamdarǵa koronavırýsqa qarsy úshinshi vaktsınany engizýdi bastaýy múmkin ekenin málimdedi, dep habarlaıdy QazAqparat Kyodo agenttigine silteme jasap.

Úkimettiń densaýlyq saqtaý salasyndaǵy sarapshylary úshinshi vaktsınatsııanyń qajettiligimen kelisip, mınıstrliktiń ekinshi dozany alǵannan keıin kem degende segiz aıdan keıin adamdardy vaktsınalaýdy bastaý josparyn maquldady.

Yqtımal revaktsınatsııa qarasha aıynan bastalýy múmkin, bul kezde úkimet vaktsınalanýǵa quqyǵy bar barlyq adamǵa ekpe salýdy aıaqtaýǵa nıetti.

Densaýlyq saqtaý, eńbek jáne áleýmettik qamtamasyz etý mınıstrligi úsh dozanyń barlyǵy bir óndirýshiden bolýy kerek dep málimdedi, biraq qorytyndy jasamas buryn ol qosymsha zertteýlerdi qarastyrady.

Qazirgi ýaqytta Japonııada Pfizer Inc., Moderna Inc. jáne AstraZeneca Plc kompanııalary ázirlegen COVID-19-ǵa qarsy úsh vaktsına bar, árqaısysy eki dozadan engiziledi.

Zertteýler kórsetkendeı, ekinshi vaktsına engizilgennen keıin alty aıdan soń COVID-19 antıdeneleriniń sany azaıady, al Delta nusqasyna qarsy vaktsınanyń tıimdiligi ýaqyt óte kele tómendeıdi.