Japonııa bıligi eldiń soltústik shyǵysyn qalypqa keltirý úshin qosymsha $50 mlrd bóledi
ASTANA. QazAqparat - Japonııa úkimeti 2011 jyly naýryzda bolǵan tsýnamı jáne jer silkinisi saldarynan japa shekken eldiń soltústik shyǵysyndaǵy aýdandardy qalypqa keltirý úshin qosymsha 6 trln ıen (shamamen $50 mlrd) bóledi.
Bul týraly Kıodo aqparattyq agenttigi habarlady.
Osylaısha, Japonııa bıligi eldiń soltústik shyǵysyn qalypqa keltirý úshin jalpy alǵanda 30 trln ıennen astam ($250 mlrd astam) qarajatty jumsamaq. Onyń negizgi bóligi kóp zalal keltirilgen Ivate, Mııagı jáne Fýkýsıma prefektýralarynda jańa úılerdiń qurylysyna, sondaı-aq aımaqtaǵy aldaǵy ýaqytta bolýy múmkin tabıǵı apattarǵa daıyndyq jumystaryna baǵyttalady.
9,0 magnıtýdaly jer silkinisi men 2011 jyldyń naýryzyndaǵy tsýnamı saldarynan Japonııada 18 myńnan astam adam qaza tapty. 350 myńnan astamy baspanasyz qalsa, taǵy 600 myńy qaýipsiz jerge kóshýge májbúr boldy.
