Japonııa bıligi elde kúshti jer silkinisi qaıtalanýy múmkin ekenin eskertti

ASTANA.KAZINFORM - Dúısenbi kúni keshke Japonııanyń soltústik-shyǵysynda 7,5 baldyq  jer silkinisi bolyp, kem degende 34 adam jaraqat aldy, dep habarlaıdy Kyodo. 

Bılik budan da kúshti jer silkinisi qaıtalanýy múmkin ekendigin eskertip, kólik qozǵalysy men sý júıesi toqtatyldy, al birneshe aýdanda mektepterdegi sabaq toqtatyldy.

Japonııa meteorologııalyq agenttiginiń habarlaýynsha, Aomorı prefektýrasynyń shyǵys jaǵalaýynda saǵat 23:15-te 54 shaqyrym tereńdikte bolǵan jerasty dúmpýinen keıin aldaǵy kúnderi sol aımaqta osyndaı jer silkinisi qaıtalanýy múmkin. Agenttik Hokkaıdo jaǵalaýyndaǵy aýdandar men Aomorıden Ivate jáne Mııagı prefektýralary arqyly sozylyp jatqan Sanrıký jaǵalaýy úshin mundaı eskertýdi alǵash ret jarııalap otyr.

Úkimet Aomorı men Ivate prefektýralarynda shamamen 1360 úı qubyrlardyń zaqymdalýyna baılanysty sýsyz qalǵanyn habarlady.
Bilim mınıstrligi men jergilikti bılik organdarynyń málimeti boıynsha, Aomorı prefektýrasyndaǵy 139 memlekettik bastaýysh, orta jáne joǵary mektepterde jáne Hokkaıdodaǵy 48 mektepte sabaq toqtatyldy.

Aomorı prefektýrasynyń Tynyq muhıty jaǵalaýyndaǵy ıadrolyq otyndy qaıta óńdeý zaýytynda paıdalanylǵan otyn saqtaý basseıninen sý aǵyp ketti, biraq ol ǵımarattan tys aımaqqa taramady.

Hokkaıdodaǵy atom elektr stantsııalarynda jáne soltústik-shyǵys Aomorı, Mııagı jáne Fýkýsıma prefektýralarynda qalyptan tys jaǵdaı tirkelgen joq.
Japonııa meteorologııalyq agenttigi jer silkinisinen keıin 3 metrge deıin tsýnamı bolýy múmkin ekenin eskertti. Degenmen Ivate prefektýrasynda tirkelgen tsýnamıdiń maksımaldy bıiktigi 70 sm boldy.

Buǵan deıin Japonııada joıqyn jer silkinisi bolǵanyn habarlaǵan edik.