Japonııa Azııa oıyndarynyń estelik kúmis monetalaryn shyǵara bastady
ASTANA. KAZINFORM – Japonııanyń moneta saraıy bıyl jyl sońynda Nagoıada ótetin Azııa oıyndary men Azııa paraoıyndaryna arnalǵan estelik kúmis monetalardy shyǵara bastady. Monetalarǵa sportshylar men oıyndardyń tumarlary beınelengen, dep habarlaıdy Kyodonews.
Taza kúmisten jasalǵan monetalardyń eki túriniń bir jaǵynda Paloma Mıdzýho stadıonynda jarysqa qatysyp jatqan sportshylardyń beınesi qashalǵan. Al ekinshi jaǵynda tıisinshe Azııa oıyndary men Azııa paraoıyndarynyń tumarlary sanalatyn Honohon men Ýdzýmın beınelengen.
– Tańdalǵan tústeri keremet. Bul oıyndar týraly estelikti bolashaq urpaqqa jetkizetin muranyń bir bóligine aınalady, – dedi dúısenbi kúni ótken rásimde Aıtı prefektýrasynyń gýbernatory ári oıyndardy uıymdastyrý komıtetiniń tóraǵasy Hıdeakı Omýra.
Dıametri 40 mıllımetr, salmaǵy 31,1 gramm bolatyn monetalardyń árqaısysy 34 800 ıenge (220 AQSh dollary) satylyp jatyr. Bir adamǵa bir monetadan ǵana satyp alýǵa ruqsat etiledi.
Japonııanyń moneta saraıy málimetinshe, satyp alýǵa ótinimder 23 maýsymǵa deıin poshta arqyly nemese onlaın qabyldanady.
Azııa oıyndary Nagoıada 19 qyrkúıekte bastalady, al Azııa paraoıyndarynyń ashylýy 18 qazanda ótedi.
Aıta keteıik, qazaqstandyq eskekshiler Azııa chempıonatynda jalpykomandalyq esepte kósh bastady.
Sondaı-aq elimizde alǵash ret estetıkalyq toptyq gımnastıkadan Azııa chempıonaty ótetinin jazdyq.
