Japonııa Azııa oıyndarynyń ashylýyna 10 myń polıtsııa qyzmetkerin jumyldyrady
ASTANA. KAZINFORM – Japonııanyń ortalyq bóligindegi Nagoıa qalasynda kelesi aptada ótetin Azııa oıyndarynyń ashylý saltanatyndaǵy qaýipsizdikti qamtamasyz etýge shamamen 10 myń polıtsııa qyzmetkeri jumyldyrylady. Bul týraly beısenbi kúni Ulttyq polıtsııa agenttigi málimdedi, dep habarlaıdy Kyodo News.
Aıtı-Nagoıa Azııa oıyndarynyń ashylý saltanaty 19 qyrkúıekte qaladaǵy jeńil atletıka stadıonynda ótedi. Oǵan Japonııa ımperatory Narýhıto men ımperatrıtsa Masako jáne basqa da joǵary laýazymdy tulǵalar qatysady. Al Premer-mınıstr Sanae Takaıchıdiń saltanatqa qatysatyny josparlanbaǵan.
10 myń polıtsııa qyzmetkeriniń 3,1 myńy eldiń ár óńirindegi polıtsııa bólimshelerinen arnaıy jiberiletin jedel jasaqtardan turady.
Saltanat ótetin nysan men ımperatorlyq jup ornalasatyn jerdiń shamamen 1 shaqyrym aýmaǵy drondar ushyrylmaıtyn aımaq retinde belgilenedi. Bul shaǵyn ushqyshsyz áýe apparattarynyń ushýyna qatysty talaptardy kúsheıtken jaqynda qabyldanǵan zańǵa sáıkes júzege asyrylady. Zańnyń qaıta qaralǵan nusqasy ımperator qatysatyn is-sharaǵa alǵash ret qoldanylmaq.
«Jalǵyz qasqyr» formatyndaǵy terrorıstik shabýyldarǵa qarsy turý úshin Ulttyq polıtsııa agenttigi dúısenbi kúni osyndaı qaýipterge qatysty aqparatty jınaıtyn ortalyq qurady. Onyń mamandary áleýmettik jelilerdegi qaýip tóndiretin jazbalardy da baqylaıdy. Qaýipsizdikti qamtamasyz etý sharalarynda jasandy ıntellekt tehnologııalary da paıdalanylady.
Soltústik Koreıa men Iran da qatysatyn sporttyq doda Japonııada 1994 jyldan beri alǵash ret ótkiziledi. Negizinen Aıtı prefektýrasynda ótetin Azııa oıyndary 4 qazanǵa deıin jalǵasady.
Oıyndar kezinde sportshylar Nagoıa portynda turǵan krýızdik kemede de ornalasady. Osyǵan baılanysty polıtsııa organdary Japonııanyń jaǵalaý kúzetimen birlesip qaýipsizdik sharalaryn kúsheıtýdi josparlap otyr.
Aıta keteıik, buǵan deıin Japonııadaǵy Azııa oıyndarynda boks boıynsha Qazaqstannan sharshy alańǵa kimder shyǵatynyn jazdyq.
Sondaı-aq aýyr atletıkadan el namysyn kimderdiń qorǵaıtyny da belgili boldy.
