Japonııa Azııa elderine munaı satyp alýǵa $10 mlrd bóledi
ASTANA. KAZINFORM – Japonııa Taıaý Shyǵystaǵy ahýalǵa baılanysty munaı jetkizilimindegi táýekelder kúsheıgen tusta Azııa elderine 10 mlrd dollar kóleminde qarjylaı qoldaý bóletinin málimdedi, dep habarlaıdy Kyodo.
Bul sheshim aımaq elderiniń, sonyń ishinde Ońtústik-Shyǵys Azııa memleketteri qaýymdastyǵyna (ASEAN) múshe memleketterdiń qatysýymen ótken onlaın kezdesýden keıin jarııalandy. Bólinetin qarajat energetıkalyq jetkizilim tizbegin nyǵaıtýǵa baǵyttalady. Atap aıtqanda, munaı men munaı ónimderin satyp alýǵa nesıe berý, sondaı-aq strategııalyq qorlardy ulǵaıtý sharalary qarastyrylǵan. Tokıonyń baǵalaýynsha, bul kómek kólemi shamamen 1,2 mlrd barrel munaıǵa teń, bul ASEAN elderiniń bir jyldyq ımportymen shamalas.
Sanae Takaıtıdiń aıtýynsha, Japonııa ekonomıkasy Azııa naryqtarymen tyǵyz baılanysty, sondyqtan óńirdegi munaı jetkizilimindegi kez kelgen irkilis eldiń ónerkásibi men áleýmettik salasyna eleýli áser etýi múmkin. Ásirese Ormýz buǵazy tóńiregindegi ahýal alańdaýshylyq týǵyzyp otyr. Osy baǵyttaǵy jetkizilimderdiń buzylýy munaı baǵasynyń ósýine ákelip, ımportqa táýeldi Azııa elderine qysymdy kúsheıtti.
Qarjylaı qoldaý, sonyń ishinde, Japonııa halyqaralyq yntymaqtastyq banki arqyly kórsetiledi. Sonymen qatar baǵdarlama ulttyq munaı qorlarynan tikeleı jetkizilimdi qarastyrmaıtyny jáne eldiń ishki energetıkalyq qaýipsizdigine áser etpeıtini belgili boldy.
Buǵan deıin Japonııa 16 naýryzdan bastap benzın men basqa da munaı ónimderi baǵasynyń kúrt ósý qaýpine baılanysty munaı qorlaryn qysqarta bastaǵany habarlandy.
