Japonııa Aıǵa qondyrý modýli bar zymyran-tasyǵyshyn ushyrdy

TOKIO. QazAqparat – Japonııa eldiń ońtústik-batysyndaǵy Tanegasıma ǵarysh ortalyǵynan bortynda Aıǵa qondyrý modýli bar H2A zymyran-tasyǵyshyn ushyrdy, dep habarlaıdy QazAqparat Kyodo aqparat agenttigine silteme jasap.

Japonııa Aı betine núktelik qoný tehnologııasyn synaýǵa arnalǵan shaǵyn SLIM zondynyń kómegimen burynǵy Keńes Odaǵy, AQSh, Qytaı jáne Úndistannan keıin Aıǵa ǵarysh kemesin qondyrǵan besinshi el bolýdy kózdep otyr.

Japonııanyń aeroǵaryshtyq zertteýler agenttiginiń málimetinshe, H2A zymyran-tasyǵyshy jospar boıynsha tańǵy saǵat 8:42-de ushyp, al SLIM zondy 47 mınýttan keıin zymyrannan bólinip shyqty.
Sondaı-aq, zymyran bortynda bolǵan juldyzdar men galaktıkalardaǵy plazmany baqylaýǵa arnalǵan XRISM rentgendik astronomııalyq spýtnıginiń sátti ajyratylǵany týraly habarlandy.
Zymyran sátti ushyrylǵany týraly aqparat osy jyldyń naýryz aıynda JAXA jáne Mitsubishi Heavy Industries Ltd kompanııalary ázirlegen jańa býyndy H3 zymyran-tasyǵyshyn ushyrýdyń sátsiz áreketinen keıin keldi. Eldiń 2005 jyldan beri H2A zymyrandaryn osymen qatarynan 41 ret sátti ushyrǵany habarlandy.
Japonııanyń premer-mınıstri Fýmıo Kısıdanyń aıtýynsha, ǵaryshtyq jarystyń kúsheıýin eskere otyryp, «negizgi» zymyran-tasyǵyshyn jasaý eldiń táýelsiz ǵarysh qyzmeti úshin «mańyzdy».
«Biz H3 zymyranyn sátti qaıta ushyrý jáne ǵaryshty odan ári zertteý úshin jumysty jalǵastyramyz dep úmittenemiz», - dep jazdy Fýmıo Kısıda X áleýmettik jelisinde.
Budan buryn habarlanǵandaı, Úndistan óziniń «Chandraıan-3» ǵarysh apparatyn Aıdyń ońtústik polıýsine qondyrǵan tórtinshi el boldy.