Japonııa Aıǵa qonatyn alǵashqy modýlin ushyrdy

ASTANA. QazAqparat – Japonııa Aıǵa qonatyn modýli bar N2A zymyran-tasyǵyshyn ushyrdy. SLIM modýlin Japonııa Aeroǵarysh zertteýler agenttigi (JAXA) qurastyrǵan, dep habarlaıdy QazAqparat Deusche Welle basylymyna silteme jasap.

N2A zymyran-tasyǵysh búgin, tańerteń Kagosıma prefektýrasynyń ońtústigindegi Tanegasıma ǵarysh aılaǵynan ushyryldy. Ushyrylym sátin JAXA tikeleı efırden kórsetti.

Buǵan deıin aýa raıynyń qolaısyzdyǵyna baılanysty ushý birneshe ret keıinge qaldyrylǵan bolatyn.

Apparattyń bıiktigi – 2,4 metr, salmaǵy – 200 keli. Onyń maqsaty bet-álpetti taný júıelerinde qoldanylatyn tehnologııalar negizinde Aı kraterlerin jáne relefin zertteý. Sondaı-aq SLIM arnaıy kameramen jabdyqtalǵan, onyń kómegimen Aı betindegi temir men ózge de elementterdiń mólsherin ólsheı alady.

Apparatty jasaý kezinde qoldanylǵan tehnologııalar belgilengen jerge qonyp, 100 metrden artyq qatelik jasamaýǵa múmkindik beredi. Aıǵa qonatyn burynǵy apparattarda bul kórsetkish birneshe shaqyrymǵa deıin jetetin, dep atap ótti AFP agenttigi.

Aıta keteıik, eki apta buryn Aı betine «Chandraıan-3» mıssııasy aıasynda úndistandyq apparat sátti qonǵan bolatyn. Úndistan Jer serigi betine ǵarysh apparatyn qondyrǵan tórtinshi el atandy. Buǵan deıin bul mıssııa Keńes Odaǵy, AQSh pen Qytaıdyń qolynan kelgen edi. Al reseılik «Lýna-25» stantsııasy tamyzdyń sońynda Aıǵa qoný kezinde qırap qaldy.