Japonııa atom energetıkasynyń úlesin azaıtpaq
ASTANA. QazAqparat - Japonııa atom energetıkasynyń úlesin azaıtyp, jańartylǵan energııa kózderin paıdalanýdy eki ese arttyrmaq. El Úkimeti endi jasyl ekonomıka saıasatyn ustanyp qana qoımaı, arzan qýat kózin tabýdy kózdep otyr, dep habarlady www.24.kz.
Eger jospar júzege assa, 15 jyldan keıin Kúnshyǵys eli qajetti qýattyń tórtten bir bóligin tıimdi energııa kózderinen alatyn bolady. Al ol úshin el bıligi aldynda ekiniń birin tańdaý joly tur. Ne ınvestorlardyń seniminen aıyrylý kerek nemese qarapaıym halyqtyń qaltasyn qaǵýǵa týra keledi. Japonııa - álemdegi eń iri elektr qýatyn tutynýshy 10 eldiń biri. Degenmen memleket elge qajetti energııanyń 80 paıyzyn shetelden ákeletin janar-jaǵarmaıdan óndirip júr. ıAǵnı shıkizatqa degen táýeldilik Japonııa úkimetin elektr qýatyn tutynýdyń tıimdi joldaryn izdeýge májbúrleıdi. Uzaq merzimdi josparǵa sáıkes, 2030 jylǵa deıin eldiń 50 paıyzy búgingideı tabıǵı qazba baılyqtary arqyly elektrmen qamtylýy tıis. Al energııany atom salasynda óndirý úlesi 30-dan 20 paıyzǵa azaıady. Bul rette kún, jel, sý syndy ekologııalyq taza qýat kózderiniń kólemin arttyrý mindeti tur.
Kún jáne jel energetıkasy qymbat ári turaqsyz keledi. Degenmen elektr júıelerin ulǵaıtyp, úlken qalalardan shalǵaı aımaqtarǵa deıin múmkindiginshe tıimdi energııa tartý kerek. Bizdiń josparymyzdy saralap, qısynsyz tustary kóp, ony júzege asyrý qıyn bolady deıtinder de bar. Biraq biz túbegeıli osyndaı sheshim qabyldadyq», - dedi Japonııa úkimetiniń keńesshisi Masakadzý Toıota.
Japonııa - kún energetıkasyn zań shyǵarýshy organ deńgeıinde elep-ekshep baryp qolǵa alǵan birden-bir memleket. Alaıda tıimdi elektr qýatyn paıdalaný jospary araǵa 20 jyl salyp qana naqty nátıje bere bastapty. Aıta keteıik, Fýkýsımadaǵy jarylystan keıin úkimettiń atom salasyndaǵy keıbir jobalary toqtap qalǵan bolatyn. Degenmen Japonııa bir jyldyń ishinde-aq alapat jarylys zardaptaryn joıyp, kem-ketiktiń ornyn toltyrdy. Aldymen kúnnen qýat alatyn elektr tarıfterin qymbattatyp, tıimdi jospar túzip shyqty.
Alaıda qazir alǵa qoıǵan josparǵa jetý úshin ınvestorlar qoldaýy aýadaı qajet. Búginde ınvestıtsııalyq qor jumysyna qarjylyq qıyndyqtar kedergi keltirip otyr. Óıtkeni kún elektr stansalarynda óndiretin energııany satyp alýshylar qatary azaıa bastapty. Buǵan tarıf qunynyń ósýi túrtki boldy deıdi mamandar. Eger elektr baǵasy arzandap, jaǵdaı bir qalypqa túspese qarapaıym tutynýshynyń qaltasyn qaǵyp, eldiń narazylyǵyn týdyrýy múmkin. Ondaı kún týa qalsa úkimettiń baǵasy arzan qandaı balama tabaryn ázirge eshkim tap basyp aıta almaıdy.
